Membru Komisaun Politika Nasionál (CPN-sigla Portugés) Komite Sentral FRETILIN (CCF-sigla Portugés), Arcenio Paixão Bano. Imajen/ Argentina Cardoso

RAEOA, 09 abríl 2022 (TATOLI)— Tuir oráriu kampaña ne’ebé fó sai ona hosi Komisaun Nasional Eleisaun (CNE-sigla Portugés), sábadu ne’e, Kandidatu Prezidente Repúblika, ho númeru sorteiu 2, Francisco Guterres Lú-Olo, hala’o kampaña iha Rejiaun Administrativu Espesiál Oé-Cusse no Ambeno (RAEOA), maibé adia fali ba kuarta (13/04).

“Ami simu fali kontaktu hosi ekipa susesu nasionál nian katak kampaña kadidatu Lú olo adia fali ba kuarta semana oin,” Membru Komisaun Politika Nasionál (CPN-sigla Portugés) Komite Sentral FRETILIN (CCF-sigla Portugés), Arcenio Paixão Bano, hateten ba Agência TATOLI iha nia rezidénsia Oé-Cusse, Sábadu ne’e.

Notísia relevante:Lú Olo promete bainhira reeleitu sai PR sei hadi’a povu-nia moris

Kampaña adia tanba Kandidatu Lú-Olo halo hela kampaña eleitorál ho tipu komisiu iha Munisípiu Lautem.

Maske nune’e,  ekipa susesu Lú Olo nian iha RAEOA kontinua hala’o mini kampaña hamutuk ho partidu tolu hanesan FRETILIN, PLP  no KHUNTO inklui partidu seluk balun hodi fó vitória ba kandidatu Lú Olo.

“Ami hala’o mini kampaña iha fatin ualu mak hanesan Sub Rejionál Pante Makasar Oesono, Lifau, Taiboko, Sakato, Oesilu, Hauana, Nitibe, Oenuno, Lele Ufe no seluk tan,” nia dehan.

Programa prioridade ne’ebé sira utiliza ba iha mini kampaña sira mak buat hirak ne’ebé Lú Olo nia mandatu halo ona liu-liu hanesan promulga lei barak atu RAEOA bele utiliza ba halo dezenvolvimentu.

“Prezidente Lú Olo importante tebes mai ami Oé-Cusse oan tanba durante nia mandatu hosi tinan kotuk no tinan ne’e promulga ona lei no dekretu lei barak atu fasilita halo dezenvolvimentu,” nia dehan

Dekretu-lei hirak ne’ebé aprova fó susesu ona hanesan projetu bee moos besik 20 ne’ebé komunidade barak mak hetan ona bee moos, iha setór eskola kuaje projetu 20, Estrada rurál hahú halo melloramentu, fasilidade saúde nian.

“Programa hirak ne’e mak ami ko’alia iha mini kampaña sira kuandu Lú Olo sae tan nia sei servisu hamutuk ho Governu hodi lori dezenvolvimentu barak mai Oé-Cusse,” nia afirma.

Iha sorin seluk, Diretór CNE RAEOA, Tomas Oki Meta, rekoeñe simu duni informasaun hosi CNE nasionál katak kampaña ba kandidatu Lú Olo nian iha RAOEA adia fali ba kuarta semana oin.

“Mudansa ne’e sira hosi Dili mak hatene tanba sira komunika ho Dili, oráriu mudansa ne’e ami simu ona katak kampaña ohin nian adia fali ba 13 abríl,” nia afirma.

Notísia relevante: Reelitu: Lú Olo reafirma sai Prezidente Repúblika ba povu tomak

Jornalista: Hortencio Sanchez

Editór     : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here