OÉ-CUSSE, 08 abríl 2022 (TATOLI) – Diretór Programa Nasionál Dezenvolvimentu Suku (PNDS), Rejiaun Administrativa Espesiál Oé-Cusse Ambeno (RAEOA), Sebastião Tanesi, fó-sai katak iha tinan 2022 ne’e sei Rehabilita Sede Suku (RSS) unidade hitu (7) iha sub-rejiaun Pássabe no Nítibe.
“Reabilitasaun sede suku ba tinan ne’e, ita sei implementa iha faze datoluk nian, hanesan Pássabe iha suku rua, Malelat ho Abani, no suku lima (5) iha sub-rejiaun Nítibe, hanesaan suku Ban-Afi, Lela-Ufe, Usitaco, Bene-Ufe no Suni-Ufe,” Sebastião Tanesi, informa ba Agência Tatoli iha Palaban, Oé-Cusse, sesta ne’e.
Nia fó-sai katak, planu orsamentu ba unidade hitu ne’e hamutuk rihun $84,00 no kada RSS hetan rihun $12,000 ne’ebé fiksa ona dezde tinan 2021 ne’e.
“Atu implementa ami sei la’o-tuir prosesu, tanba nia orsamentu operasionál balu tama ona iha konta bankária suku maibé balu seidauk, entaun ita hein bainhira tama ona ita bele hahú faze konstrusaun, parese fulan maiu ita bele la’o ona,” nia fó-sai.
Nia informa, kona-ba implementasaun RSS iha sub-rejiaun Oésilo iha unidade tolu (3), maibé ne’e autoridade RAEOA mak sei responsabiliza, tanba tuir koordenasaun ho Sekretáriu Rejionál ba Asuntu Administrasaun katak, unidade tolu iha Oésilo autoridade mak sei halo.
Nune’e mós iha sub-rejiaun Pante Makasar PNDS reabilita ona unidade ualu (8) iha tinan 2021, entaun tinan ne’e kontinua fali bai ha sub-rejiaun Pássabe no Nítibe nian.
“Durante projetu hotu hala’o iha Oé-Cusse, ami tenki la’o tuir matadalan PNDS, maske prosesu naruk, maibé ami esforsu nafatin atu garantia implementasaun ho kualidade tanba uza Orsamentu Jerál Estadu nian iha teritóriu Oé-Cusse,” nia katak.
Jornalista : Abílio Elo Nini
Editór : Evaristo Soares Martins
