Loron Mundial Saude.Imajen/espesial

DILI, 08 abríl 2022 (TATOLI)— Organizasaun Mundiál ba Saúde (OMS) sujere ba ema hotu atu prioritiza saúde ne’ebé ekitavel (hanesan) hodi  proteje sistema ekolojia no saúde atu bele harii sosiedade nia moris di’ak.

Ho mudansa klimátika ne’ebé aumenta beibeik sai hanesan ameasa ida ne’ebé hasoru no kada tinan lakon ema tokon 13 nia moris, tanba kauza husi ambientál ne’ebé bele evita, Nune’e OMS apela ba ema hotu atu prioritiza saúde ne’ebé ekitavel no aselera prosesu sira hodi bele proteje sistema ekolojia no saúde atu bele harii sosiedade nia ben-estar.

“Mudansa klimátika tau ita hotu nia saúde, ben-estar no fó risku ba ema billiaun barak nia dezenvolvimentu ne’ebé sustentavel iha Rejiaun tomak no globalmente. Ida ne’e mós empata progresu ne’ebé hala’o dékada ona hodi hamenus taxa moras ne’ebé relasiona ho mortalidade no morbidade nian. Ita tenke foti asaun agora hodi proteje ita-an no planeta ida ne’e saudavel nafatin,” Diretór Rejionál OMS Rejiaun Sudeste Áziatiku Poonam Khetrapal Singh, hateten iha nota ne’ebé TATOLI asesu, sesta ne’e. 

Mudansa klimátika ne’e tuir estimasaun bele aumenta tan númeru ema mate 250,000 kada tinan entre 2030 no 2050. Tanba ne’e, “OMS apela ba governu sira no ema hotu atu foti medida sira hodi bele proteje ‘Ita-nia planeta, ita-nia saúde,’ hanesan tema ba Loron Mundiál Saúde 2022”.

OMS konsidera Rejiaun Sudeste Áziatiku, ne’ebé iha populasaun liuhusi billiaun rua ne’e vulneravel tebes ba mudansa klimátika no númeru ema mate ne’ebé maka aas liu kauza husi mudansa klimátika.

Udan boot no inundasaun ne’ebé akontese beibeik, inséndiu florestál no tempu bailoron ne’ebé kauza husi mudansa klimátika fó ona impaktu bo’ot ba saúde no meiu ba moris no kauza sofrimentu ne’ebé bo’ot, problema saúde mentál, mate no ema muda ka dezlokamentu, iha nivel globál no mós iha rejiaun nia laran.

Temperatura ne’ebé aumenta sai hanesan surtu prinsipál ba moras infesioza, stroke, trauma no mate tanba rai manas. Bainhira labele kolleta ne’ebé liga ho mudansa klimátika ne’ebé kauza má-nutrisaun no deznutrisaun.

“Hanesan mós ho polutante ne’ebé estraga ita-nia ár no fó impaktu ba ita-nia saúde. Globalmente populasaun liuhusi pursentu 90 mak dada iis ár pulosionadu ne’ebé rezulta ema tokon 7 mak mate kada tinan inklui ema tokon 2.4 mak mate iha Rejiaun Sudeste Áziatiku,” refere nota ne’e.

Nune’e mós Pandemia COVID-19 ida ne’e mós aumenta tan  desizaun politíka, sosiál no ekonomia ne’ebé dezigual no la sustentavel.

“Ita iha oportunidade dala ida hodi transforma, no iha mudansa ne’ebé dura ba tempu naruk. Pandemia COVID-19 hatudu ona mai ita katak bainhira foti desizaun ne’ebé transparente, tuir evidénsia, no inkluzivu, ema hotu sei fó apoiu ba politika ida ne’ebé forte no bele proteje sira-nia saúde, família no ben-estar,” Diretora Rejionál  ne’e afirma. 

OMS apela ba nasaun sira hotu atu bele fó prioridade ba saúde ne’ebé ekitavel agora no jerasaun futuru mak inklui investimentu ba longu prazu, orsamentu ne’ebé di’ak, protesaun sosiál, no estratejia legal no fiskál hodi permiti sosiedade atu bele moris di’ak no hodi realiza ema hotu nia direitu ba saúde no dezenvolvimentu enkuantu proteje ita-nia planeta, no medida prioridade sira seluk.

Dahuluk, projete no prezerva fonte ba saúde umana; natureza. Hadi’ak kualidade ár, suporta ba florestasaun no agrikultura sustentavel no haforsa sistema saúde.

Daruak, investe iha serbisu saúde esensiais husi bee no saneamentu ba enerjia moos iha fasilidade saúde. Ida ne’e mós aliña ho Deklarasaun Malé iha tinan 2017, hodi harii fasilidade saúde ne’ebé reziliente ba klimátika no promove prátika sira mak amigavel ba ambiente.

Datoluk,  garante transformasaun enerjia saúde ne’ebé lais. Enkuantu nasaun sira iha Rejiaun halo ona progresu ne’ebé di’ak ba enerjia renovavel, aumenta asaun ne’ebé presiza, akompaña ho aplikasaun ba padraun ár ne’ebé iha kualidade.

Dahaat, promove sistema ai-han ne’ebé sustentavel no saudavel. Moras barak mak kauza husi menus ai-han ka konsume hahan prosesa iha lata no bebida midar sira mak hanesan kontribudór ba moras la hada’et

Dalima, harii sidade ida ne’ebé saudavel no amigavel ho espasu públiku ne’ebé saudavel hodi bele enkoraja atividade fiziku, hamenus emisaun gas no asidente trafíku.

“Ita iha tempu importante tebes desizaun no asaun sira ne’ebé ita foti agora bele aumenta estraga sistema ekolojia ne’ebé sustenta saúde umanu no ben-estar, ka bele promove mundu ida ne’ebé saudavel, justu no furak liu. Ita tenke serbisu hamutuk hodi kombate krize klimátika, proteje saúde ba ema hotu no garante jerasaun futuru ida ne’ebé di’ak liu,” nia akresenta. 

Notísia relevante:Selebra loron mundiál saúde, MS-OMS kuda ai-oan atu proteje saúde ambientál

Jornalista : Felicidade Ximenes

Editór      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here