Konidisaun Eskola Bázika Filiál Holsa, postu administrativu Maliana, munisípiu Bobonaro. Imajen Tatoli/Sérgio da Cruz.

BOBONARO, 08 abríl 2022 (TATOLI) – Koordenadór Eskola Bázika Filiál (EBF) Holsa, postu administrativu Maliana, munisípiu Bobonaro, Domingo Barreto Viçente, husu Ministériu Edukasaun, Juventude no Desportu (MEJD) presiza halo konstrusaun foun eskola refere ho modelu infraestrutura permanente tanba semí-permanente la dura ba tempu naruk.

Nia husu MEJD atu halo intervensaun ba eskola ne’e tanba kondisaun eskola atuál iha sala aula neen kompostu hosi sala-tolu konstrui dezde 2008 ho tipu semí-permanenti ka didin de’it ho bebak no sala aula seluk konstrui iha 2015 ho modelu meia-parede no modelu temporária.

“Eskola rua ne’e konstrui kleur ona, agora ninia kondisaun ladi’ak ona, ai sira-ne’e balu dodok ona depois  projetu eskola ida fali sala tolu ne’e ladún iha kualidade, kuandu anin boot mai atu foti tomak de’it, ne’ebé karik iha planu atu halo konstrusaun tenke muda ona hosi modelu temporária ba permanente atu ita-nia oan sira bele hetan edukasaun ho di’ak,” nia informa ba jornalista Tatoli, iha kna’ar-fatin, iha Maliana, sesta ne’e

Koordenadór Eskola Bázika Filiál Holsa, Domingos Barreto, hatudu hela kondisaun eskola refere hahú lahuk daudaun ona. Imajen Tatoli/Sérgio da Cruz.

Koordenador ne’e afirma, iha nesesidade duni MEJD atu halo konstrusaun foun tanba daudaun ne’e EBF Holsa mak iha kapitál ne’e ninia kondisaun infastrutura didin de’it ho piku no la furak ona hosi ema-nia haree bainhira hetan vizita hosi pesoál importante ruma iha nasionál no internasionál.

Nune’e  haree ba kondisaun reál ne’e manorin sira mós sente trsite tanba uma tatis ida de’it ho eskola CAFE Maliana ne’ebé ninia kondisaun infrastrutura eskola furak no kualidade di’ak.

“Foin lalais ne’e sira hosi UNESCO mai ho dehan nusá mak eskola CAFE nia kondisaun di’ak los, más eskola públiku ne’e ladi’ak fali, ita hatene katak antes estabelese eskola CAFÉ, ami-nia eskola iha uluk no komforme imformasaun hosi komunidade katak eskola Holsa ne’e mak estabelese uluk iha kapitál Maliana iha tempu Indonézia nian kedas, maibé agora sei kontinua ho kondisaun hanesan ne’e,” nia informa.

Problema ne’e parte dirijente eskola levanta beibeik ba MEJD, maibé iha semana kotuk ministru Armindo Mai, haree direitamente ona ho matan.

“Maske ami-nia kondisaun eskola hanesan ne’e maibé nunka hamate ami-nia vontade no motivasaun nu’udar manorin ida ami  haree fasilidade atu hanorin iha ai-hún de’it mos ami prontu,” nia katak.

Tuir observasaun Jornalista Tatoli nota iha terrenu, katak fo’er no surat tahan sira mós soe arbiru de’it iha eskola ninin sira tanba laiha lixeiru. Nune’e mós movimentasaun livre tantu hosi ema la’o-ain no animál tanba laiha moru protesaun.

Enkuantu EBF Holsa iha sala aula neen fahe turnu rua, estudante primeiru-anu to’o terseiru-anu turnu  dadeer no hosi 08:00 ba to’o 12:40 no estudante hosi kuartu-anu to’o sestu anu turnu lokraik hosi tuku 13:00 sai tuku 15:30 ho totál estudante na’in-301, profesór 11, reklamadu ida, permanente lima no kontratadu nai’in-neen.

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here