Fundasaun Pátria kapasita feto potensiál RAEOA hakbiit abilidade lideransa transformativu. Imajen Tatoli/Abílio Elo Nini.

OÉ-CUSSE, 08 abríl 2022 (TATOLI) – Fundasaun Pátria, hamutuk ho parseiru servisu advokasia hosi Sekretaria Estadu Igualdade no Inkluzaun (SEII) sesta ne’e fasilita formasaun ba feto potensiál sira ne’ebé durante agrupamentu iha Assosiasaun Feto Mudansa Ekonomia Família (AFMEF) ho tema ‘Empoderamentu Abilidade Lideransa tranasformativa feto’ iha Rejiaun Administrativa Espesiál Oé-Cusse Ambeno (RAEOA).

Board Fundasaun Pátria, Laura Pina Menezes Lopes, hatete, formasaun ne’e hala’o durante loron rua, ho objetivu prinsipál hasa’e koñesimentu ligadu ba maneira lideransa transformativu hodi haburas no hametin abilidade feto iha vida polítika no lideransa.

“Formassaun ne’e atu ajuda maluk-sira iha koñesimentu halo ezersísiu másimu atu hasa’e abilidade ba asuntu lideransa ligadu ho foti desizaun, halo jestaun ho hanoin inovativu no kreatividade feto-sira, ho hamutuk dezenvolve ita-nia rai,” Laura Pina Menezes Lopes, ko’alia iha formasaun ne’e, ne’ebé hala’o iha Palaban, Oé-Cusse.

Matéria prinsipál iha formasaun ne’e ho pakote lideransa transformativu komposta hosi sensibilizasaun kuadru estratéjiku feto iha lideransa, enkuadramentu legál, public speaking, igualdade jéneru ho lideransa tranformasionál,

Nune’e mós métodu formasaun ne’e 50% fahe matéria, 50% role play, ezersísiu traballu pesoál nomoos individual. Iha sesaun sei hahú ho pre-test no remata ho posttest nomoos halo evaluasaun eskrita.

“Fundasaun Pátria nu’udar organizasaun sosiedade sívil, atu hala’o servisu advokasia ligadu ba empoderamentu partisipasaun feto iha dezenvolvimentu, kontinua ezekuta programa formasaun ba maluk feto-sira iha iha munisípiu, hodi kontinua hakbiit abilidade lideransa transformativu feto iha prosesu dezenvolvimentu,” nia informa.

Fundasaun Pátria realiza misaun ne’e implementa ho programa ‘balance for better’ nu’udar esforsu estratéjiku hodi hakbiit, atu hala’o formasaun hodi haburas partisipasaun feto ho kualidade, no advokasia ba balansu jéneru, tanba feto nu’udar autór iha prosesu dezenvolvimentu ne’ebé inkluzivu no sustentavél.

Adjunto Prezidente Autoridade RAEOA, Maximiano Neno, hatete, envolvimentu feto ba prosesu dezenvolvimentu, autoridade tau konsiderasaun maka’as, atu apoia feto sira atu promove inisiativa no kreativaidade.

“Formasaun sira ne’e, importante atu kapasita inan feto-sira ho koñesimentu oinoin, grupu ne’e atu la’o presiza ema ho karáter lideransa ida atu lidera organizasaun ne’e, hanesan grupu rai no impresta osan, presiza jestaun ho karáter lideransa no grupu atu halo promosaun ba kreatividade oinoin, entaun ita agradese ba fundasaun pátria mai fahe matenek ba inan-feto sira iha Oé-Cusse,” nia katak.

Entretantu, partisipa iha formasaun ne’e maioria mai hosi responsavél grupu feto, Asosiasaun Feto Mudansa Ekonómia Familia hamutuk 34 iha Oé-Cusse.

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan