Eskola EBC Darlau iha Balibar. Imajen/ONU

DILI, 08 abril 2022 (TATOLI)–Eskola Ensinu Báziku Central (EBC, sigla portugés) Darlau, postu administrativu Cristo Rei, munisípiu Dili seidauk hetan fasilidade adekuadu hanesan bee-moos, salaun enkontru, eskritóriu, biblioteka, no sala gabinete.

Diretór Eskola EBC Darlau, Manuel Soares da Silva, husu Ministériu Edukasaun Juventude no Desportu (MEJD) atu apoiu infraestrutura eskola.

“Antes ne’e ami laiha problema ho bee-moos, maibé hafoin inundasaun iha loron 04 abril 2021, estraga kanalizasaun bee sira entaun kuandu udan mai maka ami foin hetan bee, maibé bailoron bee-moos menus,” Diretór Eskola hateten iha Eskola EBC siklu 123 Darlau, suku Balibar, sesta ne’e.

Notísia relevante: Governu Xina apoiu ekipamentu ba eskola lima iha Dili

Tuir Dirijente eskola, preokupasaun ne’e hato’o ona ba MEJD, hahú kedan bainhira nia asume knaar maibé to’o agora seidauk hetan resposta.

“Proposta ne’ebé hato’o la anexu ho orsamentu, maibé aprezenta de’it dezeñu konstrusaun,” nia akresenta.

Enkuantu, sala aula iha Eskola EBC Darlau hamutuk sia, maibé uza hitu ba sala aula no rua ba gabinete no biblioteka.

“Sala sira fahe ba turnu rua ho totál estudante hamutuk na’in-316 no profesór hamutuk na’in-21, kompostu hosi kontratadu hitu desde tinan 2013, permanente hitu no voluntáriu hitu,” nia informa.

Iha sorin seluk, Vise-Ministru Edukasaun Juventude no Desportu, António Guterres, hateten, proposta hosi hosi eskola sira iha ona ninia meza, maibé konstrusaun tuir faze tanba parte ministériu haree liu ida ne’ebé mak sai prioridade.

“Hafoin maka sei halo fali levantamentu dadus hodi haree nesesidade sira. Proposta sira ne’e atu halo sala aula, biblioteka no sala ba profesór sira,” governante ne’e akresenta.

Jornalista : Tomé Amado

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here