Porta vóz ekipa susesu kandidatura Prezidente Repúblika 2022-2027, Francisco Guterres, Lú-Olo, Fernando Dias Gusmão. Imajen Tatoli/Antonio Dasiparu

DILI, 08 marsu 2022 (TATOLI)–Reprezentante Legál hosi kandidatu Prezidente Repúblika Fransico Guterres Lú Olo, Fernando Gusmão, husu ba Komisaun Nasionál Eleisaun atu toma medida rigorozu hodi hatudu imparsalidade nu’udar órgaun supervizaun imparsiál ba eleisaun segunda volta tuir regra Estadu haruka.

Tuir ekipa susesu kandidatu Prezidente Repúblika 2022-2027, Francisco Guterres Lú Olo, hakarak alerta ba públiku tomak katak iha 07 abríl 2022, iha Atsabe, instituisaun públika sira envolve iha monitorizasaun kampaña la hatudu autoridade nein imparsialidade tanba husik de’it kandidatu José Ramos Horta no partidu CNRT viola regra Estadu nian.

“Kandidatu José Ramos Horta no partidu CNRT tau sira-nia an iha regra eleitorál nia leten maibé laiha reasaun hosi CNE, nu’udar entidade públika ne’ebé tenke halo supervizaun  ba eleisaun prezidensiál ida-ne’e tuir regra hatuur hosi  Estadu,” Fernando Gusmão hateten ba jornalista sira liuhosi komunikadu imprensa, iha Hotel Luz Clarita, sesta ne’e.

Nia dehan liuhusi karta protestu ne’ebé hatama ona ba CNE, ekipa susesu kandidatu PR Francisco Guterres Lú Olo fó-hanoin ba entidade ne’e katak iha violasaun ba regra sira hatuur iha lei no dekretu Governu tuir mai.

“Lei Númeru 4 /2017, 23 fevereiru, aprova alterasaun dalimak  ba lei númeru 7/2006,  28 dezembru, kona-ba lei eleitorál ba Prezidente Repúblika, kona-ba prinsípiu kampaña eleitorál artigu 28, alínea 2 hateten CNE verifika respeitu ba prinsípiu sira-ne’e, aplika hosi loron  determina  data  eleisaun no adota medida sira-ne’ebé garante kumprimentu no dezenvolvimentu pásífiku  kampaña eleitoral,” nia dehan.

Nia mós esplika, Dekretu Governu númeru 3/2022, 10 Janeiru, alterasaun dahuluk ba Dekretu Governu númeru 5/2017, 27 fevereiru, ne’ebé regula ba kampaña no propaganda eleitorál.

Kona-ba limitasaun tempu kampaña eleitoral, artigu 11 hosi dekretu ne’e regula katak “propaganda eleitorál bele de’it akontese hosi tuku 08h00 dadeer to’o 18h30.

Ekipa susesu kandidatu Francisco Guterres Lú Olo husu mós ba mídia no públiku tomak atu matan moris nafatin, nune’e la husik ema ida hakat liu regra Estadu nian ne’ebé garante sosiedade nia moris ho dixiplina koletiva atu hotu-hotu kontribui ho responsabilidade hodi hametin Estadu Direitu Demokrátiku, pás no estabilidade, iha  Timor-Leste livre no independente ho justisa sosiál.

Vise Prezidente Komisariu Nasionál Eleisaun, Domingos Barreto, hateten ho akontesimentu iha Atsabe ne’e tanbá atrazu kandidatu numeru 01 mai hosi postu administrativu Lolotoe, Bobonaro, Atara no to’o fali iha Atsabe ne’e kalan ona no horas liu tiha ona, nune’e mak CNE hetan informasaun mak haruka PNTL halo kedas intervensaun ho diretór CNE.

“CNE autoriza ekipa kandidatura numeru 01 hodi fo deit tara tais ba maun bo’ot durante 15 minutus nia laran deit”, dehan nia.

CNE haruka ona karta ida ba kanditu Prezidente Repúblika José Ramos Horta ho númeru sorteiu 01 nia ekipa hanesan toma atensaun ida ba sira, maibé husu ba sira atu kontinua kumpre regra sira hosi orgaun eleitorál.

Nune’e mós, CNE mós simu ona karta protesta ida hosi ekipa kandidatu Prezidente Repúblika ho númeru sorteiu 02 relasiona ho sira-nia lamentasaun sira-ne’e.

Jornalista : Osória Marques/Domingos Piedade Freitas

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here