Xefe Departamentu Administrasaun no Lojístika CNE munisípiu Ermera, Elisabeth Fátima Soares. Imajen TATOLI/Jogerjo Guterres

ERMERA, 08 abril 2022 (TATOLI)–Komisaun Nasionál Eleisaun (CNE, sigla portugés) deteta kampaña segunda volta ho tipu mini-kampaña iha postu administrativu Atsabe, munisípiu Ermera, viola lei eleitorál.

Atividade kampaña hala’o hosi ekipa susesu Kandidatu Prezidente Repúblika (PR) hosi Partidu Congresso Nacional de Reconstrução de Timor (CNRT) períodu 2022-2027, ho númeru sorteiu 01, José Ramos Horta.  

“Kampaña iha Atsabe liu oras determinadu, ami simu kontaktu hosi nasionál katak sira (ekipa susesu) hosi Bobonaro mai tarde entaun bele autoriza minutu lima atu realiza de’it seremónia simu ekipa, maibé momentu ne’e ekipa susesu sa’e ba palku hodi halo intervensaun polítika. Bainhira liu minutu lima ne’ebé ami autoriza, maka konsidera viola regra tanba bazeia ba lei eleitorál katak kampaña eleitorál hahú iha dader tuku 08:00 no ramata iha 18:30, kuandu liu entaun kontra ona lei,” Xefe Departamentu Administrasaun no Lojístika CNE munisípiu Ermera, Elisabeth Fátima Soares, hateten ba Agência TATOLI iha postu administrativu Hatulia B, munisípiu Ermera, sesta ne’e.

Notísia relevante: CNE Covalima identifika labarik partisipa iha kampaña eleitorál

Ho infrasaun sira ne’e maka ekipa CNE munisípiu Ermera foti ona dadus no relata ba parte kompetente hodi haree.

“Realidade mini-kampaña ne’ebé halo iha Atsabe liu oras ne’ebé prevee iha lei, sira halo to’o kalan tuku besik tuku 20:00,” nia akresenta.

Enkuantu, durante mini-kampaña iha Hatulia B, Reprezentante CNE munisipál observa katak atividade la’o di’ak.

“Tuir ami-nia observasaun kampaña ne’e la’o ho di’ak no tuir duni oráriu ne’ebé mak iha tanba ne’e maka hetan mós supervizaun hosi CNE no organizasaun seluk,” nia haktuir.

Labarik kiik partisipa kampaña

CNE kategoriza partisipasaun labarik kiik iha kampaña iha rua hanesan partisipa direta no indereta.

“Ita hatene eleitór sira iha ne’e (Hatulia B) dala ruma antusiazmu ba kandidatu ida ne’ebé mai, entaun inan sira labele husik hela oan, maibé sira dada oan sira mai partisipa maski iha lei hateten katak partisipasaun labarik menór idade labele, maibé tanba antusiazmu, inan-aman nian problema maka sira labele husik sira-nia oan mesak iha uma. Realidade labarik kiik sira nafatin partisipa direta tanba sira-uza atributu kandidatu,” nia esplika.

Tuir Elisabeth Fátima, loloos labele maibé tanba akontese ona entaun CNE nafatin relata ba parte relevante hodi toma konsiderasaun.

“Tanba ami-nia papél klaru katak ami só observa hodi halo relatóriu no relata ba nasionál, relatóriu finál mak sei fó xamada ba aktu sira ne’ebé kandidatu sira komete,” nia tenik.

Jornalista : Antónia Gusmão

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here