Jornalista Agência TATOLI, Antónia Gusmão, halo entrevista ho Ministru Transporte no Komunikasaun (MTK), José Agustinho da Silva, iha resintu Parlamentu Nasionál, segunda (13/12). Imajen TATOLI/António Gonçalves

BAUCAU, 07 abríl 2022 (TATOLI) – Ministru Transporte no Komunikasaun, José Agustinho da Silva, fó-sai katak governu tenke iha desizaun koletiva ba folin kombustível ne’ebé oras ne’e sa’e maka’as nune’e povu labele sai vítima.

Ministru José Agustinho simu ona informasaun hosi autoridade sira hosi munisípiu kona-ba ezijénsia motorista sira atu hatún folin mina ka hasa’e tarifa ba pasajeiru sira.

Governante ne’e akresenta, situasaun refere akontese tanba impaktu mundiál ligada ho folin mina sa’e iha merkadu globál no daudaun ne’e afeta mós Timor-Leste.

“Ne’e desizaun koletiva ida, hanesan MTK, Ministériu Turismu, Komersiu no Industria (MTKI) no ministériu relevante seluk atu hamutuk haree asuntu ne’e. Bainhira iha solusaun ba transporte terrestre entaun tenke iha solusaun mós hosi parte seluk tanba ikus liu ne’e ita-nia populasaun mak vítima,” Ministru José Agustinho da Silva hateten iha aeroportu Baucau, kinta ne’e.

Maske nune’e, Governante ne’e orienta ona kargu xefia sira atu halo esplikasaun ba públiku nune’e bele iha intendimentu no bele armoniza situasaun refere.

Nia dehan, ne’e foin hosi parte transporte maibe iha parte seluk folin mina sa’e sei fó impkatu ba nesesidade bázika ne’ebé povu konsumu kada loron nune’e presiza entidade hotu-hotu hamutuk atu foti desizaun kona-ba situasaun ne’e.

“Problema sira-ne’e iha maibe oinsá mak ita kanaliza atu armoniza situasaun ne’e atu populasaun kbiit laek sira labele sai fali vítima ba ita-nia desizaun,” José Agustinho argumenta.

Jornalista    : Natalino Belo  

Editór           : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here