Mota sobu hariis fatin no sala aula turma komérsiu, iha Eskola Ensinu Sekundáriu Tékniku Vokasionál Hera. Imajen TATOLI/Tomé Amado

DILI, 07 abril 2022 (TATOLI)–Ministériu Edukasaun Juventude no Desportu (MEJD) deside hapara provizóriu prosesu konstrusaun iha Eskola Sekundáriu Tékniku Vokasionál Hera ba sala aula neen no eskritóriu ba profesór sira.

“Ha’u rona katak obra ba edifísiu foun ne’e pendente provizóriu to’o loron 28 abril hodi haree kondisaun udan tanba mota iha área ne’e sempre fó ameasa ba eskola ne’e inklui komunidade,” Diretór Nasionál Ensinu Sekundáriu Tékniku Vokasionál hosi MEJD, Agostu Pereira, hateten iha ninia knaar fatin, Villa-verde, kinta ne’e.

Notísia relevante: MEJD seidauk halo intervensaun ba Eskola Tékniku Vokasionál Hera

Tuir parte Diresaun Nasionál Infraestrutura Eskolár (DNIE) kestaun ne’e tanba edifísiu rua tama ona iha risku boot no distánsia entre eskola ba mota metru 50 de’it ona, tanba ne’e hapara obra iha tempu balun, bainhira laiha ameasa ruma maka konstrusaun bele hahú fali.

“Kestaun atu hahú la hahú ne’e kabe ba kompeténsia diresaun atu halo analiza ba situasaun no kondisaun udan, tanba buat hotu ita bele halo maibé natureza mak sei termina. Tuir ami hatene bainhira obra ne’e finaliza, labarik sira bele hetan fasilidade di’ak,” nia akresenta.

Diretór Agostu Pereira preokupa bainhira mota ne’e la hetan atensaun másimu, ba futuru sei fó ameasa boot liu ba eskola ne’e inklui komunidade ne’ebé hela iha área refere.

Jornalista : Tomé Amado

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here