MAP identifika tratór-sira iha RAEOA molok halo leilaun. Imajen Tatoli/Abílio Elo Nini.

OÉ-CUSSE, 07 abríl 2022 (TATOLI) – Ministériu Agrikultura no Peska (MAP), kinta ne’e halo identifikasaun ba kondisaun tratór sira iha sentru agrikultura iha Aenmat, suku Lalisuk, Rejiaun Administrativa Espesiál Oé-Cusse Ambeno (RAEOA) molok halo leilaun.

Xefe Departamentu Nasionál, ba alimentár mekanizasaun no post kolleta, Suzana Vila Nova, hatete, objetivu identifika tanba mákina sira iha territóriu Timor-Leste atu halo manutensaun no leilaun tanba maioria liu ona prazu utilizasaun

Nune’e, mós MAP fasilita formasaun ba tratorista-sira atu fó hanoin kona-ba mékaniku no tratorista durante hala’o serbisu iha sentru manutensaun no halo operasaun ba tratór sira iha terrenu, tanba tuir planu ne’e tratór-sira uza ba tinan 10 de’it kaundu liu ona ne’e, tenke leilaun ona.

“Tinan 10 liu, Governu fahe ona tratór barak, agora ita foku ba manutensaun depois mekániku sira sei mai apoia, hodi hatene hira mak aat, persiza hadi’a ka halo leilaun, no hira mak ita sei utiliza ba fila-rai nian, nune’e Governu bele halo planu atu aumenta kuantidade ba programa fila rai komunidade nian,” Suzana Vila Nova, ko’alia iha sentru formasaun agrikultura suku Lalisuk.

Nune’e mós MAP fasilita formasaun ba tratorista-sira, atu fó hanoin kona-ba mekanizmu serbisu no jestaun halo manutensaun ba tratór sira.

Nune’e, tuir planu MAP hala’o ona identifikasaun iha munisípiu ualu (8), Covalima, Baucau, Manatuto, Viqueque, Bobonaro, Ainaro no Lautem ikus iha RAEOA.

Tuir nia, maioria tratór sira iha munisípiu kuaze aat hotu, balun protesta tanba manutensaun laiha, tán ne’e ba futuru ministériu sei kria mekanizmu atu halo manutensaun ba tratór ne’ebé avaria, sira-ne’ebé aat totál sei halo leilaun nomoos sei bele aumenta tán.

Diretór Agrikultura RAEOA, Cirilo dos Remedios Baba, orienta ona tékniku sira kona-ba veíkulu operasionál, tanba kada tinan RAEOA prevee orsamentu ba manutensaun.

“Ne’e duni ita presiza kooperasaun ho ministériu atu identifika sira-ne’ebé tama katogoria leilaun, no ida-ne’ebé tama manutensaun A no B, nune’e bele  rezolve, atu aumenta ka sufisiente hela,” nia katak.

Nia informa, iha 2010 Oé-Cusse sei munisípiu simu tratór hosi MAP hamutuk unidade-21, maibé daudaun ne’e hela unidade-hitu (7) mak funsiona di’ak atu atende agrikultór-sira ba programa fila-rai, tanba Oé-Cusse só hala’o de’it iha primeira époka depende hosi udan-been.

“Komesa RAEOA hamriik 2015 mai leten, ita laiha fila-rai gratuita, ita hasai sirkulár ba xefe suku atu hatene, katak to’os-na’in ne’ebé propoin atu fila-rai ba nia kintál, sira mak prepara gazoel no gazolina, autoridade apoia tratór fila rai ba sira-nia to’os,” nia katak.

Entretantu, totál tratorista iha Rejiaun Administrativa Espesiál Oé-Cusse Ambeno (RAEOA) hamutuk na’in-24.

Jornalista: Abílio Elo Nini
Editór: Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here