MAP kapasita estensionista RAEOA maneira salva ai-han hosi peste Lakataru makerek. Imajen Tatoli/Abílio Elo Nini.

OÉ-CUSSE, 06 abríl 2022 (TATOLI)–Ministériu Agrikultura no Peska (MAP), kinta ne’e fasilita formasaun ba tékniku estensionista suku sira kona-ba prevensaun ba peste lakataru, hodi hasa’e produsaun agríkola iha Rejiaun Administrativa Espesiál Oé-Cusse Ambeno (RAEOA).

Kapasitasaun ne’e realiza durante loron rua, hahú kuarta to’o kinta (6-7 abríl) ne’e iha sentru produsaun agrikultura suku Lalisuk, sub-rejiaun Pante Makasar.

Xefe Departamentu Protesaun ba Plantasaun no Hortikultura hosi nasionál, Americo Brito, hatete formasaun ne’e foka liu ba seguransa alimentár, oinsá hasa’e produsaun rai laran, tanba agrikultór sira enfrenta menus ai-han tanba ataka hosi peste lakataru.

“Ohin ita formasaun oinsá prevene lakataru hanesan saúde ba ai-han ne’ebé hetan ataka hosi peste lakataru hahú kedas iha 2020, tanba hama foun ne’e estraga batar no hare iha territóriu tomak, agora mós sei eziste nafatin, entaun ita persiza fó hanoin ba estensaun tanba sira mak frontline,” Americo Brito, ko’alia iha sentru formasaun agrikultura suku Lalisuk.

Nia solisita ba prezensa tékniku estensionista iha suku importante, atu rezolve problema agrikultura iha baze, ajuda agrikultór sira salva ai-han ne’ebé produs ona iha to’os no natar.

Tán ne’e MAP habelar informasaun, bainhira ba fali iha baze bele esplika ba agrikultór sira, tanba métodu kontrolu ba peste lakataru diferente, tanba lakataru iha tipu barak entaun modelu atu prevene mós iha tipu oinoin.

Diretór Agrikultura RAEOA, Cirilo dos Remedios Baba, agradese ba Governu sentrál liuhosi Ministériu Agrikultura no Peska, tanba fasilita formasaun ba tékniku agrikultura atu salva produsaun agrikola iha Oé-Cusse.

“Formasaun ne’e importante fasilita tékniku sira oinsá hasa’e produsaun, nu’udar servidór Estadu ba área agrikultura, ita tenke luta salva ai-han ne’ebé hetan atakasaun, sei ita hotu-hotu husik, kada tinan produtu no hahán sei depende maka’as fali ba importasaun, tan ne’e ha’u agradese ba Governu sentrál tanba mai apoia ita maske ita rejiaun espesiál maibé kolaborasaun servisu ba povu importante,” nia orgullu.

Nia informa, durante ne’e Diresaun Rejionál Agrikultura prodús ona pestisida orgánika ho modelu tradisionál, hodi limita utilizasaun kímiku salva plantasaun batar no hare ne’ebé hetan atakasaun hosi peste lakataru.

“Meiu ida ne’e ami uza bainhira akontese dezastre, no prosesu prodús pestisida orgániku ne’e mai hosi lis-mean no mutin, ai-manas lotuk, rinso, dulas hamutuk halo kombinasaun, no rai durante tolu, mak foin halo atuasaun,” nia katak.

Entretantu, totál tékniku estensionista iha RAEOA hamutuk na’in-24, ne’ebé destaka iha suku 18 iha pertensia sub-rejiaun Oésilo, Pássabe, Nítibe, Pante Makasar.

Jornalista      : Abílio Elo Nini

Editór            : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here