Estasaun kombustível iha Dili. Imajen Tatoli/Egas Cristóvão

DILI, 07 abril 2022 (TATOLI)—Jerente estasaun kombustivel Mãe da Graca, Miulde Gomes, hateten folin mina ne’ebé sa’e iha Timor-Leste halo sira-nian rendimentu menus to’o 50% kompara ho presu mina normál.

“Ami-nia rendimentu ne’e tun makaas tanba ami-nia taxa mós sa’e. Depois ema sira mai ense la hanesan baibain. Dala barak ema mai ense mina la to’o $10 tanba mina folin sa’e makaas. Tanba  ne’e ami-nia rendimentu tun la hanesan baibain,” Miulde Gomes ba Tatoli iha Praia dos Coqueiros, kinta ne’e.

Nia informa, kompania Mãe da Graca sei hapara traballadór balun tanba labele selu salariu ba servisu-nain sira-ne’e.

“Se ami bele ko’alia karik traballadór balun ami bele hasai, tanba ami labele atu selu ona. Mina folin sa’e bebeik hanesan ne’e ami araska. Tanba, ami-nia mina ne’e la’ós ami foti iha rai-li’ur, maibé ami hetan mina hosi fornesedór mina rua mak Pertamina Internasionál no Pertamina ETO. Ne’ebé, presu mina sa’e ne’e, ami tuir fali ba sira-nia presu, tanba ami hola fali mina hosi sira,” nia hateten.

Tanba ne’e, folin mina iha estasaun kombustivel Mãe da Graca ba gazolina litru ida ho $1,30 no gazoel $1,35, tanba iha mudansa ba folin mina hosi importasaun kompañia rua kada fulan dala rua, hahú hosi loron 01 to’o 15 no hosi 15 to’o 30.

Iha sorin seluk, motorista mikrolete diresaun 01, Virgílio Paulo Soares, akresenta, mina nia folin sa’e halo sira-nia rendimentu menus tanba pasajeiru sira sei selu hanesan hela ho folin mina normál.

“Loron ida ami hetan de’it rendimentu $40. Hosi ne’e dala ruma ami setór la to’o, tanbá mina nia folin sa’e. Tanba ne’e, se mina folin sa’e makaas nafatin ami transporte públiku sira sei halo diskusaun hodi halo greve,” Virgílio Paul Soares hateten ba Ajénsia Tatoli iha Merkadu Lama, kinta ne’e.

Jornalista : Nelia Fernandes

Editór       : Cancio Ximenes  

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here