Prezidente FFTL, Francisco Jerónimo. Imajen TATOLI/Francisco Sony

DILI, 07 abríl 2022 (TATOLI)— Prezidente Federasaun Futeból Timor – Leste (FFTL) Francisco Martins da Costa Pereira Jerónimo, hateten durante kongresu anuál Federation International Football Association (FIFA) iha Qatar, iha rezultadu di’ak tanba FIFA kompromete ajuda FFTL hodi dezenvolve futeból iha país ne’e.

“FIFA ko’alia ona mai ita, osan ne’ebé sira haruka mai ita ne’e sei la hasai, maibé mantein nafatin la lakon, sira husu ita mak servisu makas oinsa atu lori futeból ba oin,” dehan Prezidente FFTL ne’e ba Agência TATOLI iha edifisiu FFTL, kinta ne’e.

Notísia relevante:  FIFA louva FFTL tanba futeból TL hatudu progresu di’ak

Tanba, FIFA hakarak apoia FFTL atu hala’o infrastrutura sira hanesan estádiu sira ne’ebé di’ak tuir padraun internasionál iha Timor-Leste.

“Infrastrutura atu harii kampu futeból ne’e loos ona, maibé dokumentu rai nian ne’e seidauk loos ne’e mak sira husu ita atu halo loos tia dokumentu ne’e. Tanba 90% projetu FIFA nian mai Timor hodi harii estádiu ne’e sira konkorda ona atu konstrui estádiu iha Dili finaliza, hafoin bele loke dalan tan atu harii kampu futeból sira iha Munisipiu,” nia afirma.

Tuir kritériu FIFA katak rai ne’ebé atu konstrui estádiu ne’e hosi privadu ka rai Estadu mós tenke halo kontratu ho dokumentu ne’ebé klaru.

“Esforsu FFTL nian mak lao hela kona-ba estádiu Dili, dokumentu hosi Ministériu Justisa intrega ona mai ami, maibé falla iha nia redasaun tanba tenke sita organizasaun nia naran hanesan FFTL, labele tau fali individu ema ida nia naran, ha’u hanesan Prezidente FFTL bele asina dokumentu, se tau naran ema ida ba futuru bele mosu problema,” Prezidente FFTL ne’e esplika.

Nune’e, Prezidente FFTL Haruka fila ona dokumentu ba Ministériu Justisa atu hadi’a,  bainhira loos ona tinan ne’e, bele implementa ona projetu ba estádiu munisipál Dili.

Kada tinan, FIFA kompromete  apoia orsamentu ba FFTL millaun $1-resin atu finansia atividade futeból iha nasaun ne’e.  Enkuantu orsamentu ba infrastrutura ne’e pakote ketak, maibé presiza hadi’a dokumentu molok transfere osan.

“Orsamentu kada tinan ba ita ne’e FIFA mantein nafatin, maibé iha dalan seluk tan ba ita hanesan fundu solidaridade ne’ebé la inklui ba orsamentu anuál ne’ebé ita hetan mós,” nia akresenta.

AFF prontu fasilita kampu treinu

Entretantu, Atual Miinistru Asuntu Parlamentar no Komunikasaun Sosial (MAPKOMS), informa nia parte hasoru malu ona ho Prezidente Asian Football Association (AFF) ho nia Sekretáriu Jerál hodi bele fasilita kampu treinu ba selesaun nasionál Timor-Leste, molok partisipa eventu internasionál sira.

“Haree ba ita nia fatin halo Training Camp seidauk iha ba ita nia jogadór selesaun nasionál sira, nune’e ha’u ho ekipa konsege too iha Bangkok-Tailandia hodi  ko’alia ho Prezidente AFF ho nia estrutura atu fasilita ita nia jogadór sira bele ba halo Traning Camp hafoin ba partisipa iha eventu balu ita bele ba halo Traning Camp uluk iha nasan sira iha Azia ne’e balu ou lae Thaolabdia rasik,” Prezidente FTTL ne’e  hateten Agência TATOLI iha edifisiu FFTL, kinta ne’e.

Iha reuniaun ne’e hatudu sinál pozitivu tanba maioria nasaun sira iha Azia bele fasilita Timor -Leste hodi ba halo Training Camp hanesan Laos, Kambodia, Thailandia no seluk tan.

“Nasaun sira iha Azia ne’e hakarak ita atu ba hala’o treinamentu iha ne’eba semana ida ou rua antes tama ba kompetisaun sira, entaun tempu besik ha’u sei ba fali Kambodia atu asina akordu entre nasaun sira iha Azia ne’e atu haree ba futuru saida mak ita bele halo,” Prezidente FFTL akresenta.

Ho nune’e rezultadu enkontru hotu ne’ebé hala’o durante viajen ba liur ho AFC, AFF, FIFA no seluk tan la’o di’ak no nasaun hotu iha komitmentu atu servisu hamutuk hodi lori futeból ba oin.

Entretantu, antes ne’e Timor – Leste liuhosi selesaun nasionál bainhira atu ba kompete iha Kopa AFF no AFC sei ba halo uluk Training Camp iha Singapura, Indonézia no seluk tan. Enkuantu ba SEA Games nian FFTL fihir ona nasaun rua hansan Japaun no Koreia Súl hodi halo Training Cam hafoin partisipa Sea Games Vietname.

Notísia relevante:  AFC apresia servisu FFTL ne’ebé hatudu progresu di’ak

Jornalista: Hortencio Sanchez

Editór     : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here