Diretór Nasionál Transporte Terrestre munisípiu Viqueque, Elvino da Cruz. Imajen TATOLI/Vitorino Lopes da Costa

VIQUEQUE, 06 abril 2022 (TATOLI)–Diretór Nasionál Transporte Terrestre (DNTT) munisípiu Viqueque, Elvino da Cruz, informa, hahú hosi janeiru to’o dezembru 2021 konsege hatama reseita hamutuk $36.450 ba kofre Estadu.

“Taxa ne’e mai hosi inspesaun motór, kareta, lisensa tránzitu no karta kondusaun. Bainhira mosu COVID-19, Diresaun Servisu Transporte Terrestre munisípiu Viqueque suspende atividade, hafoin livre hosi Estadu Emerjénsia no Serka Sanitária, mak foin reativa fali atividade no taxa anuál 2021,” Diretór Nasionál Transporte Terrestre munisípiu Viqueque hateten ba Agência TATOLI, iha ninia knaar fatin, Beloi, kinta ne’e.

Notísia relevante: DNTT sei prodús blanku karta kondusaun 82.000

Hosi janeiru taxa hamutuk $4.820, fevereiru $3.670, marsu $2.610, abril $3.300, maiu $4.500, juñu $2.480, jullu $4.460,50, agostu $3.370, setembru $4.432,50, outubru $3.957,50, novembru $2.097,50 no dezembru $4.177,50.

Maski nune’e, to’o agora DNTT seidauk iha edifísiu própriu no ekipamentu protejidu ba funsionáriu menus, tanba ne’e serbisu ladún másimu hodi atinje meta hosi Governu liuhosi Ministériu Transporte no Komunikasaun (MTK).

“Atu atinje meta, presiza iha edifisiu inklui ekipamentu protejidu hodi atende kliente sira ne’ebé mai trata dokumentu,” nia akresenta.

DNTT simu karta despaixu hosi nasionál iha tinan 2016 hodi halo atendimentu ba karta kondusaun ba motorista sira, liuhosi ezame teoria, ezame prátika no prova orál.

“Maibé to’o iha tinan 2017 dokumentu hotu pendente no ninia dezafiu ida maka iha munisípiu Viqueque laiha mákina imprime hodi prosesa karta kondusaun no laiha blanku. Tanba ne’e maka dokumentu hotu ita enkamiña hotu ba DNTT Baucau hodi haree asuntu ne’e,” nia tenik.

Momentu ne’ebá dokumentu halo karta kondusaun hamutuk 3.528, maibé konsege rezolve purvolta 2.415 no kondutór sira simu ona ninia karta kondusaun maibé to’o agora balun seidauk simu karta kondusaun.

“Ami nafatin halo koordenasaun ho Diretór DNTT Baucau ho halo prolongamentu ba karta konduasaun provizóriu ho validade tinan-rua  hodi hein orsamentu tinan 2022 ne’e maka ami foin bele rezolve hotu,” nia informa.

Jornalista : Vitorino Lopes da Costa

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here