VIQUEQUE, 07 abril 2022 (TATOLI)—Kondutór bus deside halibur malu hodi deside hasa’e tarifa viajen dirasaun Uatulari-Dili ba $13, hosi folin normál $10, hodi adapta ba kondisaun folin kombustível sa’e iha semana ikus ne’e.
“Ami halo movimentu maibé gazoel litru ida sa’e ona ba $1,50. Ho ida-ne’e, ami kondutór parte Uatulari deside hamutuk hasa’e tarifa ba kada pasajeru na’in-ida selu $13,” Portavós kondutór, Carlos Afonso, hateten iha Komandu Polísia Nasionál Timor Leste (PNTL), Viqueque, kinta ne’e.
Notísia relevante: Folin kombustível sa’e, bus Viqueque deside la halo movimentu
Ba kondisaun mudansa tarifa ne’e, kondutór bus diresaun Uatulari-Dili ne’ebé halibur hamutuk iha Komandu PNTL Viqueque halo karta koñesimentu ba Diresaun Servisu Transporte Terreste (DSTT) inklui Autoridade munisípiu Viqueque.
Antes ne’e, kondutór sira deside la halo movimentu tanba folin kombustível sa’e, maibé hafoin halibur hamutuk, kondutór bus sira deside hasa’e tarifa nune’e bele kontinua la’o.
“Bainhira folin konbustível ho folin normál ami sei hatun folin $10, hanesan folin normál. Konbustível ne’ebé daudaun sa’e fó impaktu maka’as ba ami nu’udar kondutór transporte públiku, iha faze setoran no fó impaktu ba rendimentu. Ho razaun hirak ne’e ami la halo movimentu no halo greve molok hetan konkordánsia, ne’ebé hetan autorizasaun hosi parte relevante, atu aumenta tarifa,” nia akresenta.
Jornalista : Vitorino Lopes da Costa
Editora : Julia Chatarina
