Autoridade munisípiu Bobonaro liuhosi diresaun servisu merkadu no turizmu, realiza enkontru ho entidade relevante, hodi diskute planu reativa merkadu rua iha postu administrativu Maliana. Imajen Tatoli/Sérgio da Cruz.

BOBONARO, 07 abríl 2022 (TATOLI) – Autoride munisípiu  liuhosi Diresaun Servisu Jestaun Merkadu no Turizmu, kinta ne’e realiza enkontru ho entidade relevante no komunidade sira hodi diskute planu reativa merkadu rua iha postu administrativu Maliana ne’ebé daudaun ne’e la funsiona no  negosiante sira abandona hela.

Merkadu rua ne’e konstrui iha tinan 2019 ida mak merkadu Maumali, lokaliza iha aldeia Samelau, suku Ritabou, negosiante abandona durante tinan ida ona hafóin akontese kazu ofensa integridade agravadu ne’ebé hamate matebian Costódio Fátima iha fulan juñu iha tinan 2021.

Nune’e mós merkadu Soso, ne’ebé lokaliza iha suku Holsa, dezde konstrusaun remata negosiante sira seidauk utilza to’o agora tanba kestaun  distánsia dook hosi kapitál.

Autoridade munisípiu Bobonaro realiza atividade sira-ne’e bazea ba dekretu-lei númeru 3/2016 ne’ebé halo ona segundu alterasaun ba dekretu númeru-lei 4/2022 ne’ebé mak fó kompeténsia legál atu halo kontrolu domíniu ba área jestaun merkadu no turizmu.

Sekretáriu Autoridade Munisípiu Bobonaro, João Fatima do Carmo, hateten objetivu hosi enkontru ne’e atu rona opinaun hosi parte relevnte kona-ba preokupasaun sira oinsá mak bele buka meiu ida ne’ebé di’akliu.

“Meiu ne’e autoride uza atu reativa merkadu rua ne’e mak ohin ita halo aprosimasaun ba malu nune’e ba futuru merkadu sira ne’e bele utiliza ho di’ak no ida tán mak atu alista fali negosiante hirak maka fa’an iha merkadu sentrál ne’e,” nia hateten iha intervensaun.

Enkuantu iha diskusaun ne’e, Administradór Postu Administrativu Maliana, Tomás Lacu-loe foti ona desizaun katak atvidade basar semanál iha merkadu Maumali sei akontese iha loron tersa no merkadu sei akontese iha loron kinta nune’e negosiante sira bele abitua ho fatin ne’e.

Komandante Polísia Nasionál Timor-Leste (PNTL) Munisípiu Bobonaro, Superintendente Antoninho Mauluta, promete bainhira reativa merkadu rua ne’e parte komandu prontu fó seguransa másima ba negosiante sira.

“Ami mós iha ona planu katak sei instala CCTV ida iha Maumali no Tunbibi, atu kontrola komunidade sira-nia movimentu iha tempu kalan no loron, depois programa ne’e la’o ona ami sei tau iha planu orsamentu ba nasionál oinsá atu hari postu iha merkadu rua ne’e oinsá atu fó seguransa ba ita-nia negosiante sira,” nia katak.

Konsellu lia-nain hosi suku Ritabou, Tomé Viera rekomenda ba autoridade munisípiu Bobonaro bainhira reativa merkadu Maumali tenke uza ninia kompeténsia ho rigór no forte nune’e individu ka grupu balu labele kria instabilidade no impede ativida negósiu iha fatin refere.

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here