Agrikultór suku Lalisuk hahù kolleta hare Membramo époka 2022. Imajen Tatoli/Abílio Elo Nini.

OÉ-CUSSE, 07 abríl 2022 (TATOLI) – Agrikultór natar iha suku Lalisuk, sub-rejiaun Pante Makasar, Rejiaun Administrativa Espesiál Oé-Cusse Ambeno (RAEOA), hahú kulleta hare ho tipu Membramo dahuluk ba époka 2022.

Agrikultór Fransisco Leite, nu’udar na’in iha natar Holosa, hatete, agrikultór sira iha natár Lalisuk liuliu natar Holosa deside hahú halai natár ba époka dahuluk 2022 iha dezembru tinan kotuk, hodi aproveita udan been, no garante volume bee hosi bee-matan sira no kolleta iha fulan abríl ne’e.

“Natar sira-ne’e ami kuda iha janeiru, agora to’o ona nia tempu kulleta ba tinan ne’e, iha natar sira sorin Panite, Betbana’e mós sei kolleta hotu iha fulan ne’e, tanba ami hotu-hotu iha suku Lalisuk kuda hare Membramo desde uluk kedan,” agrikultór dehan ba Agência Tatoli iha suku Lalisuk, Oé-Cusse, kinta ne’e.

Planu atu kontinua faze daruak bele, maibé depende fali volume bee, tanba iha natar Holosa ne’e ami uza bee-mota, tinan kotuk mós ami halai dala ida de’it, tanba volume bee menus.

Marcelino Obe, sente kontente tanba tinan ne’e volume udan-been bo’ot, hosi sustenta natar sira to’o kolleta ho susesu.

“Ami sente kontentw tanba bee sufisiente to’o hare sira tasak, la’ós hanesan iha 2020 bee la to’o ami kolen saugate de’it, hare balu mate ami hotu-hotu la aproveita, to’o tinan kotuk nia rezultadu di’ak, agora mós di’ak, tanba tinan ne’e udan-been mai maka’as,” nia orgullu.

Maski seidauk fó sai detallu kona-ba kuantidade hosi rezultadu natar nian, maibé nu’udar agrikultór, garante sei uza atu haan sufisiente to’o tinan ida, no balu sei fa’an hosi sustenta oan-sira nia eskola.

Tuir dadús hosi Diresaun Rejionál Agrikultura RAEOA, liuhosi téknika estensionista suku Lalisuk, Marcelino da Rosa, informa agrikultór sira iha suku Lalisuk maioria kuda hare tipu membramo ba époka primeru tinan 2022, uza téknika moderna nian ho sistema jajar legowo 2:1.

Entretantu, dadus hosi diresaun agrikultura RAEOA, ba produsaun alimentár époka 2021, ba área natar kultiva ektare 4,597, no área kolleta ektare 4,485 ho rezultadu produsaun hare kulit iha Oé-Cusse purvolta tonelada rihun 17 envolve haree rai maran no natar, ho nia ekivalente tonelada rihun 10 sai foos.

Nune’e mós ba área batar epoka 2021 área kultiva ektare 6,596, área kolleta 6,567, ba produsaun batar nia produsaun iha Oé-Cusse hamutuk tonelada rihun 10.

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan