Joven sira tuir formasaun iha Sentru Formasaun Covalima. Imajen Tatoli/Celestina Teles.

COVALIMA, 07 abríl 2022 (TATOLI)—Jerente Sentru Juventude Covalima (CJC, sigla portugés), Calistro Leite Gusmão informa, iha tinan ne’e CJC fó formasaun gratuita ba joven sira-iha Covalima ne’ebé hakarak aumenta sira-nia abilidade no kuñesimentu.

“Ita-nia joven sira-ne’ebé tuir formasaun bazea ba planu atu realiza iha tinan 2022 ne’e, formasaun hanesan Live Skils Bazic Education (LSBE), lian inglés, lian portugués, edukasaun sívika, nasionalizmu no patriotizmu, karáter building, promosaun juventude, relasaun saudavél, formasaun IT mak hanesan word, excel no multimedia, formasaun internet saudavél no lideransa ho gratuita,” Calistro Leite Gusmão, hateten ba jornalista sira, iha nia knar fatin, Kampung Baru, kinta ne’e.

Sentru Juventude Covalima, fó oportunidade ba joven sira hodi tuir formasaun iha área oioin ho gratuita, maibé formasaun ba komputadór ho programa sira hanesan word excel no multimedia ne’e mak joven sira selu $5,00

Formasaun sira iha área sira hanesan Live Skils Bazic Education (LSBE), lian inglés, lian portugés, edukasaun sívika, nasionalizmu no patriotizmu, karáter building, promosaun juventude, relasaun saudavél, formasaun internet saudavél no lideransa ne’e gratuita.

“Formasaun iha área oioin ne’ebé ha’u temi iha leten hamutuk joven na’in-35-resin mak oras ne’e daudaun tuir fomasaun iha fatin ne’e. Ha’u husu ba joven Covalima-oan atu hakbesik mai iha sentru ne’e hodi tuir formasaun,” nia dehan.

Joven sira tuir formasaun iha Sentru Formasaun Covalima. Imajen Tatoli/Celestina Teles.

Antes ne’e, iha loron 29 marsu 2022, CJC submete ona proposta fundu operasionál, formasaun edukasaun sívika, programa estimulu Empreendedorizmu Sosiál Juventude Suku (PIESJS) no apoiu kustu ba programa Estimulu Emprrendedorizmu Sosiál Juventude Suku (PIESJS) ba Sekretáriadu Estadu Juventude no Desportu (SEJD) atu realiza programa no atividade ba tinan 2022 iha munisípiu Covalima.

Enkuantu bazea ba dadus iha tinan 2021, Sentru Juventude Covalima (CJC, sigla portugés) distribui ona sertifikadu ba joven sira-ne’ebé tuir kursu ne’e hamutuk formandu hamutuk 200-resin

Joven hirak ne’e tuir formasaun regulár kursu komputadór hahú hosi janeiru-juñu hamutuk joven na’in-44, iha jullu-dezembru na’in-51, formasaun Live Skils Basic Education na’in-94, formasaun lian inglés na’in-31, formasaun joven eleitu suku na’in-60.

Jornalista : Celestina Teles

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here