Ilustrasaun chegada iha aeroportu. Imajen/Espesiál

DILI, 06 abril 2022 (TATOLI)—Diresaun Jerál Imigrasaun Ministériu Justisa no Direitu Umanu Repúblika Indonézia, hahu ohin (06/04) inklui ona Timor-Leste asesu Visa on Arrival (VoA) bainhira halo vizita ba Indonézia.

“Ha’u hetan ona informasaun horikalan hosi Embaixadór Indonézia iha Timor-Leste, konfirma ona ba ha’u katak desizaun hosi Indonézia permite ona Timor-Leste asesu Visa on Arrival,” Ministra Negósiu Estranjeiru no Kooperasaun (MNEK), Adaljiza Albertina Xavier Reis Magno, hateten ba Agência TATOLI, iha Palásiu Governu, kuarta ne’e.

Notísia relevante: Adidu Imigrasaun: “Reprezentante Timor-Leste iha Jakarta presiza aprosima autoridade asesu VoA Indonézia”

Ministra haktuir, antes ne’e nia rasik haruka ona karta pedidu ba ninia omóloga, Ministra Negósiu Estranjeiru Indonézia, Retno Marsudi, hodi tetu Timor-Leste bele asesu VoA, tanba Governu Timor-Leste rasik autoriza sidadaun Indonézia livre tama territóriu nasionál.

Nune’e, Autoridade Indonézia konsidera pedidu ne’e tanba esforsu hosi MNEK no Embaixada Indonézia iha Timor-Leste (KBRI, sigla Indonézia), ne’ebé to’o momentu ne’e Embaixadór Okto Donirus Manik ho ninia ekipa iha hela Indonézia.

Iha fatin ketak, Adidu Imigrasaun Embaixada Timor-Leste, Eben Rifqy Taufan Sitopu, hateten, KBRI kontinua buka meiu no halo kordenasaun ho Governu Sentrál Indonézia.

Aleinde ne’e, Reprezentante KBRI Dili, halo vizita koordensaun direta ho Diresaun Jerál Imigrasaun Indonézia iha Jakarta inklui Ministru Justisa no Direitu Humanu Indonezia, Sandiaga Salahuddin Uno, hodi diskute kona-ba importánsia Timor-Leste hetan asesu ba VoA tanba hanesan nasaun viziñu.

“Embaixadór Indonézia no funsionáriu na’in-rua hosi KBRI halo ona vizita no komunika ho Diresaun Jerál Imigrasaun. Ami mós hasoru Ministru Justisa no Direitu Umanu, ne’ebé hatudu katak iha ona informasaun kona-ba Timor-Leste hola ona parte iha VoA. Grasa Maromak nian,” nia dehan.

Ho nune’e, daudaun Diresaun Jerál Imigrasaun Indonézia permite ona nasaun hamutuk 43 inklui Timor-Leste asesu VoA ba vizita turizta.

Jornalista : Arminda Fonseca

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here