Konstrusaun edifísiu administrasaun postu administrativu Maliana, munisípiu Bobonaro. Imajen Tatoli/Sérgio da Cruz.

BOBONARO, 06 abríl 2022 (TATOLI) – Sekretáriu Autoridade Munisípiu Bobonaro, João Fátima do Carmo, hateten progresu fíziku ba impelementasaun projetu reapropriasaun Programa Dezenvolvimentu Integradu Munisipál (PDIM) tolu iha munisípiu Bobonaro daudaun atinje ona 60%.

Projetu reapropiasaun tolu ne’e, iha projetu rua mak ho tipu klase (A) mak hanesan edifísiu administrasaun postu administrativu Maliana Vila ho edifísiu administrasaun postu administrativu Bobonaro no projetu klase (B) mak salaun enkontru Sekretariadu Tékniku Administrasaun Eleitorál (STAE) ho totál orsamentu rihun $329-resin mai hosi orsamentu kapitál dezenvolvimentu tinan fiskál 2021.

“Agora daudaun implementasaun projetu tolu ne’e ninia atinjementu fíziku ne’e 60% ba leten ona, no pagamentu mós projetu klase (A) rua ne’e fó ona kuaze 20% no ida klase (B) ne’e pagamentu kuaze 60% ita haruka ona ba atu kontinua kompleta fasilidade sira seluk,” nia informa ba jornalista sira, iha Maliana, kuarta ne’e.

Nia haktuir, projetu refere hahú halo konstrusaun iha fulan-dezembru tinan 2021, maibé dezde implementasaun iha terrenu kompañia balun hasoru difikuldade tanba kondisaun klima la permite atu fornese materiál lokal no fabrikadu atu bele aselera projetu ne’e tuir durasaun kontratu fulan neen, maibé fazeadamente obra tolu ne’e iha ona prosesu hada batako hotu ona, hein monta besi sinta leten.

Autoridade ne’e esklarese, atu aselera projetu ne’e la’o-tuir kontratu ekipa tékniku PDIM ho parte fiskalizasaun mós kada fulan sempre halo monitorizasaun rotativa atu haree progresu hosi projetu ne’e.

“Bazea ba relatóriu ne’e ekipa tékniku sira hato’o mai ami, projetu tolu ne’e hatudu progresu tanba iha projetu rua klase (A) atinje ona 60% no salaun STAE ne’e kuaze besik 80% ona, fiar katak sira implementa tuir kontratu fulan-neen,” nia katak.

Totál orsamentu hosi kapital dezenvolvimentu ne’ebé Autoridade Munisípiu Bobonaro prevee iha OJE 2021 ba konstrusaun edifísiu administrasaun postu administrativu Maliana ne’ebé resposnabliza hosi empreza lokál Lesuboro  Unipesaol Lda ho kustu $141,708.07, edifísiu administrasaun postu administrativu Bobonaro ho kustu $ 166,000 no projetu salaun enkontru STAE responsabliza hosi empreza Lombel Unipesoal Lda ho kustu $61,094.20.

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here