Diretor National Promosaun Dezevolvimentu Media Lokal, Jose da Costa. Imajen Tatoli/Francisco Sony.

DILI, 06 abril 2022 (TATOLI)—Ministériu Asuntu Parlamentár no Komunikasaun Sosiál (MAPKOMS) hamutuk ho Sekretária Estadu Komunikasaun Sosiál (SEKOMS) liuhosi Dirasaun Nasionál Promosaun Dezenvolvimentu Média Lokál (DNPDML), kuarta ne’e realiza formasaun ba jestór rádiu komunidade 17 ho tema “Utilizasaun software no live report iha rádiu hodi hasa’e kualidade informasaun”.

Diretór Nasionál Promosaun Dezenvolvimentu Média Lokál, Jose da Costa, hateten mundu ohin loron mundu modernu, entaun jestór rádiu sira tenke adapta ona sistema sira-ne’e tanba ohin loron ema ba ona iha youtube no podcast entaun liuhosi formasaun ne’e formadór sira bele fahe sira-nia esperiénsia ba formandu sira, nune’e sira bele utiliza software hirak ne’e iha sira-nia atividade servisu.

“Objetivu prinsipál hosi formasaun ne’e mak atu bele hasa’e tan koñesimentu sira-nia ba divulgasaun informasaun no knál sira-ne’ebé eziste iha mundu ohin loron,” Jose da Costa, hateten lia hirak ne’e iha ninia diskursu serimónia abertura formasaun “Utilizasaun software no live report iha rádiu hodi hasa’e kualidade informasaun” ba jestór rádiu komunidade 17, iha Hotel JL-Villa, Dili, kuarta ne’e.

Aliende, hasa’e koñesimentu ba divulgasaun informasaun, objetivu seluk hosi formasaun ne’e mós atu hasa’e jornalista sira-nia koñesimentu, nune’e bele partisipa reportajen direta iha eleisaun.

“Liuhosi formasaun ne’e, ita bele prevene informasaun falsu ne’ebé durante ne’e ita-nia sosiedade sira konsumu, tanba dala barak ita-nia publikasaun sira liuhosi mídia dala ruma la apar ho situasaun reál ne’ebé iha. Entaun, ita-boot sira mós iha knar importante atu bele prevene situasaun sira hanesan ne’e,” nia dehan.

Tanba ne’e, espera katak ho formasaun ne’e formandu sira bele utiliza ona software liu-liu iha dijitál ba konteúdu públikasaun iha sira-nia mídia ne’ebé sira haknar an bá, nune’e bainhira ramata formasaun ne’e jornalista sira bele aumenta ona kuantidade programa ne’ebé sira halo iha sira-nia estasaun rádiu ida-idak.

Jestór rádiu komunidade Tokodede Liquiça, Eduardo Exposto, hateten nia parte mai partisipa iha formasaun ne’e tanba durante ne’e rádiu komunidade estasaun 16 mós publika informasaun liuhosi online.

“Entaun, liuhosi esperiénsia ne’ebé hetan iha formasaun ne’e, ami sei servisu makaas liuhosi públikasaun notisia online tanba parte Governu mós tau fundu uitoan ba online nian, tanba ne’e ami mantein nafatin atu publika informasaun kona-ba saida de’it mak akontese iha munisípiu no asuntu ruma ne’ebé komunidade sira enfrenta, ami kontinua nafatin halo publikasaun liuhosi rádiu online,” nia dehan.

Entretantu, formasaun ne’e hala’o durante loron rua ne’ebé hahú hosi kuarta (06/04) ne’e sei termina iha kinta (07/04) ne’e.

Enkuantu, Jestór rádiu komunidade 17 ne’ebe partsipa iha formasaun ne’e kompostu hosi Jestór rádiu komunidade Tokodede Liquiça, jornalista rádiu Liberdade, jestor rádiu Manatuto, jestora rádiu Atauro no sira seluk.

Jornalista : Nelia Fernandes

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here