DILI, 06 abril 2022 (TATOLI)—Governu liuhosi reuniaun Konsellu Ministru (KM), kuarta ne’e, aprova rezolusaun Governu ne’ebé fixa vaga promosaun pesoál integradu iha rejime jerál karreira administrasaun públika ba tinan 2022.
Ministru Prezidénsia Konsellu Ministru interinu, Rui Augosto Gomes, hateten, vaga promosaun ne’e aprezenta hosi Primeira-Ministra ein ezersísiu, Armanda Berta dos Santos.
“Hosi totál vaga hamutuk 866 ba promosaun ne’ebé define iha Rezolusaun Governu ida-ne’e, Tékniku Superiór grau A hamutuk 41, Tékniku Superior grau B hamutuk 122, Tékniku Profisionál grau C hamutuk 190, Tékniku Profisionál grau D hamutuk 250, Tékniku Administrativu grau E hamutuk 164 no Asistente grau F hamutuk 99,” Ministru Rui Augusto hateten hafoin ramata ezekutivu, iha Palásiu Governu.
Notísia relevante: Prezidente KFP fó pose ba kargu xefia na’in haat
Vaga sira ne’e destina ba promosaun ne’ebé kada tinan Governu fixa, liuhosi proposta Komisaun Funsaun Públika (KFP) nian, to’o limite 10% hosi totál ema ba kada kategoria ka grupu profisionál.
KFP harii iha tinan 2009 no estabelese atu reforsa kapasidade administrasaun públika no garante katak setór públiku bazeia ba méritu no tuir modelu profisionál ne’ebé aas atubele fó ba povu servisu ne’ebé iha kualidade, efisiente, hodi garante jestaun dezempeñu ne’ebé ekonómika no efetiva.
Komisaun ne’e mós jere Sistema Informasaun no Jestaun Pesoál nian (PMIS), iha baze dadus ida ne’ebé importante ho informasaun pesoál no profisionál ba funsionáriu públiku sira hotu ho loloos.
Daudaun ne’e totál funsionáriu públiku hamutuk 32.000, ne’ebé dezde tempu VI Governu Konstitusionál, hahú hapara rekrutamentu funsionáriu permanente sira no hahú ona haree filafali kuadru jurídiku, tama mós Lei Funsaun Públika no estatutu Funsaun Públika, hamutuk ho KFP no dirijente sira área rekursu umanu sira.
Jornalista : Arminda Fonseca
Editora : Julia Chatarina
