Logotipu Eskola ESJ 05 maiu Becora. Imajen/Espesiál

DILI, 06 abril 2022 (TATOLI)—Diretór Eskola Ensinu Sekundáriu Jerál (ESJ) 05 maiu Becora, Manuel Verdial, garante tempu badak sei submete diploma estudante finalista hamutuk 709 ba Servisu Edukasaun Munisípiu Dili hodi hetan asinatura no bele fahe ona.

“Ha’u orienta ona ba profesór sira atu prenxe ho kuidadu, labele ansi no tenke profisionál, maski loron prenxe valór ba diploma hosi loron lima to’o 10 de’it, maibé tenke kuidadu hodi labele estraga fali diploma estudante sira nian,” Diretór eskola hateten iha ninia knaar fatin, Becora, kuarta ne’e.

Notísia relevante: DSED sesante asina ona diploma estudante hosi eskola ualu

Nune’e, prosesu prenxe valór ba diploma estudante la’o daudaun, ne’ebé sei asina hosi Diretór Servisu Edukasaun Munisípiu Dili, Duarte Braganza.

“Fiar katak tempu besik bele finaliza ona hodi submete ba Diretór Servisu Edukasaun Munisípiu Dili atu asina,” nia akresenta.

Iha sorin seluk, Ministru Edukasaun Juventude no Desportu, Armindo Maia, informa, iha ona eskola ualu mak submete ona diploma ba DSED hodi hetan asinatura.

“Bele dehan prosesu asinatura ba diploma ne’e kuaze metade ona,” Ministru dehan.

Iha loron 13 dezembru 2021, estudante finalista hamutuk 58.224 iha territóriu nasionál partisipa ezame nasionál, kompostu hosi estudante Ensinu Báziku 31.143, Ensinu Sekundáriu 22.223, Ensinu Sekundáriu Tékniku Vokasionál 4.858, enkuantu hosi Dili de’it iha totál estudante 16.752.

Nune’e, iha loron 20 janeiru 2022, Menistériu Edukasaun Juventude no Desportu (MEJD) anunsia rezultadu ezame nasionál hosi Eskola Ensinu Báziku no Ensinu Sekundáriu iha territóriu tomak, ne’ebé hatudu katak na’in-18 mak la pasa no 50.752 aprovadu, kompostu hosi estudante Ensinu Báziku 31.143 no Ensinu Sekundáriu 22.223.

Diretór Servisu Edukasaun munisípiu Dili, Duarte Braganza inklui Diretór Servisu Edukasaun munisipál haat seluk hetan ona ezonerasaun, enkuantu naran iha diploma nível Sekundáriu Jerál no Tékniku Vokasionál tinan akadémiku 2021 uza sira-nia naran.

Mandatu Duarte Braganza loloos termina iha loron loron 31 dezembru 2021, maibé tanba mosu desizaun polítika, MEJD hasai despaixu ezonerasaun iha loron 31 outubru 2021 hodi nomea fali Carlito da Silva nu’udar Diretór Servisu Edukasaun Munisípiu Dili foun.

Jornalista : Tomé Amado

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here