Diretór CNE Covalima, Hermenegildo de Sena. Imajen Tatoli/Celestina Teles.

COVALIMA, 06 Abril 2022 (TATOLI)–Komisaun Nasionál Eleisaun (Sigla-portugés) no Sekretariadu Tékniku Administrasaun Eleitorál (STAE), hahú realiza edukasaun votante ba eleitór sira iha munisípiu Covalima hodi halo preparasaun hasoru eleisaun prezidensiál ba segunda volta.

“CNE munisípiu Covalima daudaun ne’e tun ona ba terreñu hodi realiza atividade edukasaun votante ba eleitór sira, tanba foin lalais iha atividade barak hanesan kampaña no mini kampaña, ami ladún masímu hodi realiza edukasaun votante ba eleitór sira. Maibé eleisaun ba segunda volta hahú hala’o ona edukasaun votante ba eleitór sira,” Diretór CNE Munisípiu Covalima, Hermenegildo de Sena, informa ba Agêbcia Tatoli, iha nia knar fatin, Kampung Baru, kuarta ne’e

Razaun CNE-STAE la ladún realiza edukasaun votante tanba eleisaun primeira volta ne’e iha kandidatu prezidente repúblika na’in-16 ne’ebé realiza atividade kampaña ho tipu komisiu no mini kampañia sira.

Atu realiza eleisaun predensiál 2022 ba segunda volta ne’e, hahú iha loron segunda (04/04) ne’e CNE-STAE hahú realiza ona edukasaun votante ba eleitór sira iha postu administrativu hitu (7), suku 30 iha munisípiu Covalima ne’ebé sei finaliza iha loron sábadu (09/04) ne’e.

“Bazea esforsu ami-nian, ami atu hala’o edukasaun votante ba eleitór sira ho durasaun tempu semana rua maibé ami mós tenke haree tempu atu simu materiál sensitivu ho naun-sensitivu, ami sei halo verifikasaun. Entaun ami deside realiza edukasaun votante durante semana ida,” nia dehan.

Maske CNE-STAE realiza edukasaun votante ba eleitór sira, maibé atu ezerse sidadaun sira-nia direitu votu iha eleisaun depende konsiénsia hosi eleitór sira, tanba lei la obriga sidadaun sira atu ba tuir votasaun.

Tuir konstitusaun artigu 65 kona-ba eleisaun sira hanesan, Órgaun eleitu soberania nian ho podér lokál sei hili tuir eleisaun, hosi eleisaun universál, livre, direitu, sekretu ema ida votu ida, no periódiku, Resensiamentu eleitorál ne’e obrigatóriu, ofisiál no ida de’it no universál no sei atualiza iha eleisaun ida-idak.

Iha alenea 3 hateten kampaña eleitorál hala’o tuir prinsípiu  hirak tuirmai ne’e, hanesan Liberdade ba propaganda eleitorál, Oportunidade no tratamentu hanesan ba kandidatura hotu-hotu,  Imparsialidade na’in ulun boot públiku sira-nian kona-ba kandidatura, Transparénsia no fiskalizasaun sura votu nian,  Konversaun votu nian iha mandatu hala’o tuir sistema reprezentasaun proporsionál

Iha alínea 5 haktuir, Prosesu eleitorál sei regula tuir lei no iha alínea neen, Órgaun independente mak sei tau matan ba resensiamentu no eleisaun sira. Lei mak estabelese orgaun ne’e nia kompeténsia, kompozisaun, organizasaun no nia knar.

Bazea ba dadus hosi STAE Covalima rejistu eleitór ne’ebé atu vota hamutuk 47,476 no hosi númeru ne’e eleitór ne’ebé tuir vota iha eleisaun faze dahuluk hamutuk 37,543 ho taxa partisipa 79,065% no eleitór 10.00 resin la tuir vota.

Jornalista : Celestina Teles

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here