BOBONARO, 06 abríl 2022 (TATOLI) – Asosiasaun Futeból Bobonaro (AFB) daudaun ne’e identifika treinadór na’in-22 atu partisipa formasaun lisensa (D) ne’ebé oferese hosi Federasaun Futeból Timor-Leste (FFTL) ne’ebé tuir planu sei realiza iha tempu badak.
“Ami-nia pedidu tama tiha ona ba iha Federasaun no treinadór ne’ebé atu tuir formasaun ne’e hamutuk na’in-22 no sira-ne’e na’in-17 mai hosi klubu ne’ebé rejistu iha Asosiasaun Futeból Bobonaro no na’in-lima hosi asosiasaun nia rasik” Prezdente AFB, Domingos Gouveia Moniz, informa ba Tatoli, iha Maliana, kuarta ne’e.
Domingos haktuir, loloos antes realiza jogu sub-19 iha époka 2022 ne’e FFTL fó uluk formasaun ba Treinadór sira hosi klubu hotu-hotu, maibé tanba kampaña eleitorál entaun programa refere adia ba fulan oin.
Prezidente AFB ne’e afirma, maski programa refere adia, maibé treinadór sira nafatin iha komitmentu atu partisipa tanba liuhosi formasaun ne’e bele hasa’e tán sira-nia koñesimentu atu lidera klubu sai forte.
“Ami asosiasaun apresia ho programa hosi FFTL ne’e importante tebes, ami-nia treainadór sira presiza hetan formasaun sira hanesan ne’e, nune’e bainhira iha eventu ruma bele orienta jogadór jogu tuir regra hodi hatudu rezultadu kualidade,” nia informa.
Tuir dadaus hosi FFTL daudaun ne’e iha treinadór ne’ebé tuir ona formasaun ba lisensa B no D hamutuk na’in-200-resin iha territóriu nasionál.
Hosi númeru ne’e 60% mak hatudu progresu di’ak no sai ona treinadór ba klubu sira iha Liga Futeból Timor-Leste (LFTL), klubu sira iha Liga Futsál Timor – Leste no seluk tan. Enkuantu 40% daudaun ne’e lidera hela klubu lokál sira iha idak-idak nia munisípiu.
Formasaun ba treinadór futeból sira ne’e hahú iha 2020 to’o ohin loron prodús ona ema na’in 200-resin. Enkuantu Formasaun fó direita hosi instrutór Asian Football Confederation (AFC) ne’ebé FFTL kontrata ona iha tinan 2020 to’o agora.
Jornalista : Sérgio da Cruz
Editór : Evaristo Soares Martins
