Membru PNTL sira hala'o fomatura hodi selebrasaun aniversáriu Polisia Nasionál Timor-Leste – PNTL ba dala 22. Iha Sentru Formasaun PNTL, Comoro Dili, domingu (27/03). Imajen Tatoli/Francisco Sony

DILI, 05 abríl 2022 (TATOLI)— Komandante Jerál Polísia Nasionál Timor-Leste (PNTL), Komisáriu Faustino da Costa, informa situasaun seguransa iha territóriu nasionál la’o hakmatek, maske kampaña eleitorál hosi Kandidatu Prezidente Repúblika na’in-rua tama ona ba loron haat hahú iha sábadu (02/04) too ohin. 

Kandidatu Prezidente Repúbliku períodu 2022 too 2027, José Ramos Horta ho númeru Sorteiu 1 no Francisco Guterres Lú Olo ho númeru sorteiu 2, hahú abertura kampaña eleitorál iha loron 2 abríl.

Komandante Jerál PNTL, Komisáriu Faustino da Costa. Imajen TATOLI/Egas Cristóvão

“PNTL seidauk rejista asidente tráfegu ka insidente ruma ne’ebé akontese iha kampaña eleitorál segunda volta, durante loron haat ne’e tanba situasaun iha territóriu nasionál kontroladu no hakmatek. Maske ita-nia membru sira hasoru difikuldade hanesan rádiu komunikasaun no kondisaun Estrada,” Komisáriu Faustino, hateten ba jornalista sira bainhira partisipa semináriu internasionál ho tema”Reforsa Mekanizmu Koordenasaun  Jestaun Risku Dezastre em Timor-Leste”, iha Hotél-Timor-Dili, tersa ne’e.

Notísia relevante: Dezloka ba munisípiu, Komandu PNTL husu membru hatudu disiplina no neutru

KomJer dehan situasaun la’o normál tanba ho baze ba relatóriu  ne’ebé simu hosi hosi Komandu PNTL munisípiu sira  katak la rejista kazu ruma durante atividade kampaña eleitorál segunda volta.

Alende ne’e, PNTL mós seidauk rejista kazu fó osan ba populasaun atu fó votu ba kandidatu ida, ne’ebé daudaun ne’e espalla iha rede sosiál.

“PNTL seidauk simu keixa hosi ema balun hanesan reprezentante kandidatu sira katak kandidatu balun pratika kampana metan, se karik mosu nune’e PNTL prontu halo investigasaun,” nia informa.

Nune’e, Komisáriu Faustino husu ba membru sira hotu iha territóriu nasionál kontinua hatudu imparsialidade no neutralidade hodi asegura seguransa ba atividade kampaña eleitorál no eleisaun prezidensiál segunda volta, ne’ebé sei realiza iha loron 19 marsu ne’e.

“PNTL labele inklina ba parte ida no husu atua problema ho profisionál hodi asegura kampaña no eleisaun prezidensiál to’o nia rohan ho la’o di’ak,” Komisáriu Faustino, hateten ba jornalista sira bainhira partisipa semináriu internasionál ho tema”Reforsa Mekanizmu Koordenasaun  Jestaun Risku Dezastre em Timor-Leste”, iha Hotél-Timor-Dili, tersa ne’e.

Komandante Jerál mós husu ekipa susesu, militante no apoiante sira hosi kandidatu Prezidente Repúblika númeru sorteiu 1 no 2 atu kumpre regra no koopera ho seguransa atu fó susesu ba kampaña eleitorál no eleisaun prezidensiál.

“Husu ba ita nian kandidatu siraa atu perante kampaña eleisaun atu uza liafuan ne’ebé di’ak no labele ko’alia liafuan provokativu iha situasaun agora, nune’e apoiante sira mós evita provoka malu too kria situasaun sira seluk,” nia akresenta.

Notísia relevante:PNTL prepara ona membru 4.000-resin asegura kampaña no eleisaun

Jornalista: Natalino Costa

Editór     : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here