SEKOMS asina kontratu kona-ta Fundu Transferénsia Públiku ho responsabilidade Rádiu Komunidade Manatuto iha salaun ANC,Mercado Lama, tersa (05/04). Imajen Tatoli/Francisco Sony.

DILI, 05 abril 2022 (TATOLI)—Sekretária Estadu KomunikasaunSosiál (SEKOMS), tersa (05/04) ne’e selebra akordu tranferénsia públika ho rádiu komunidade 15 atu realiza transferénsia fundu ba faze dahuluk hodi apoia funsionamentu meiu komunikasaun sira.

Akordu ne’e asina diretamente hosi Reprezentante Sekretáriu Estadu Komunikasaun Sosiál (SEKOMS), Merício Juvinal dos reis ‘Akara’, Xefe Gabinete SEKOMS, Osorio Almeida ho jestór rádiu komunidade Manatuto, Laurente Soares Freitas no jestór rádiu komunidade Same, Vasco da Costa Mendez, iha Salaun ANC Caicoli, Díli.

Xefe Gabinete SEKOMS, Osorio Almeida. Imajen Tatoli/Francisco Sony.

“Ohin, MAPKOMS no SEKOMS, liuhosi Dirasaun Nasionál Promosaun Dezenvolvimentu Média Lokál selebra kontratu transferénsia públiku ba rádiu komunidade sira. Ida-ne’e, faze dahuluk ho 40% ba rádiu komunidade 15 ne’ebé mak iha faze dahuluk, sira sei hetan transferénsia ne’e,” Xefe Gabinete Sekretáriu Estadu Komunikasaun Sosiál (SEKOMS), Osorio Almeida, hateten ba jornalista sira.

Kada tinan Governu liuhosi SEKOMS no MAPKOMS sempre fó transferénsia públiku ne’e tinan ida dala rua, ne’ebé ohin fó faze dahuluk ba rádiu komunidade sira hotu.

Ba rádiu komunidade Ainaro no rádiu komunidade defisiénsia ohin la asina akordu transferénsia públiku ne’e, tanba sira-nia relatóriu transferénsia tinan kotuk seida’uk finál no balun iha prosesu avaliasaun intermus ezekusaun, maibé depende Governu liuhosi dirasaun halo avaliasaun sé mak merese atu hetan no la hetan.

“Ba rádiu defisiénsia sira-nian Governu sei fó, tanba entermus ita ko’alia ba regra balun ne’ebé mak rádiu komunidade bae ma defisiensia ne’e hasoru. Ezemplu sira-nia lisensiamentu, tanba Governu kuandu fó rekezitus sira-ne’e tenke prenxe hafoin fó transferénsia públiku, ne’ebé parese sei tetu mós kondisaun sira-ne’e,” nia dehan.

Jestór Rádiu Komunidade Mauloko Maubisse, Joaquim de Fatima Coutinho, sente kontente ho asina akordu ne’e maibé iha parte seluk nia mós sente triste, tanba proposta ba asina akordu ne’e la’ós jestór sira mak halo maibé Governu mak halo hodi fó ba jestór sira asina hodi implementa.

“Ida ne’e mak ami iha difikuldade lubuk ida atu fó hatene, tanba formatu ba proposta ne’e mai hosi Governu ami hein asina de’it, ida ne’e ba ami sai hanesan difikudade boot ida,” nia esplika.

Tanba, tuir formatu Governu ni’an, orsamentu ne’ebé fó ne’e sei implementa ba programa lima (5) hanesan sei haree ba Administrasaun Rádiu, Notisia, Talk Show, PSA no Drama Rádiu.

“Ida fali foun ami seida’uk haree loos tanbá atividade foun ne’e foka kona-ba oinsá atu halo reportajen hosi baze. Agora kondisaun ami-nia advez iha foho inklima la favorese, entaun ida ne’e difikulta ami. Maibé em prensípiu formatu ne’ebé Governu fó mai ami ho orsamentu ne’ebé mak iha mak bazea ba programa lima ne’e,” nia dehan.

Rádiu komunidade 15 ne’ebé selebra kontratu ho SEKOMS maka rádiu komunidade Maubisse, rádiu komunidade Comoro, rádiu komunidade Atauro, rádiu komunidade Liquiça, rádiu komunidade Ermera, rádiu komunidade Aileu, rádiu komunidade Same, rádiu komunidade Suai, rádiu komunidade Maliana, rádiu komunidade Oe-cusse, rádiu komunidade Manatuto, rádiu komunidade Bucoli, rádiu komunidade Baucau, rádiu komunidade Viqueque no radiu komunidade Lospalos.

Rádiu komunidade rua (2) ne’ebé la asina akordu mak rádiu komunidade Ainaro no rádiu komunidade bae ma ho defisiénsia.

Entretantu, Sekretaria Estadu Komunikasaun Sosiál (SEKOMS), selebra akordu tranferénsia públika ne’e ho totál orsamentu hamutuk $56,847.75.

Jornalista : Nelia Fernandes

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here