Ministru Justisa, Tiago Amaral Sarmento, hala'o enkontru ho ekipa Partidu Os Verdes. Iha salaun Ministériu Justisa, tersa (05/04). Imajen Tatoli/Francisco Sony

DILI, 05 abril 2022 (TATOLI)— Ministériu Justisa (MJ), liuhosi Diresaun Nasionál Jerál Rejistu aprova pedidu inskrisaun kandidatu partidu polítiku Os Verdes de Timor tanba kumpre rekizitu ba inskrisaun.

Ministériu Justisa halo aprovasaun ba dokumentu kandidatu partidu polítiku  Os Verdes ho baze ba Lei partidu polítiku,  númeru 2/2016, 3 fevereiru, alterasaun dahuluk ba lei númeru 3/2004, 14 abríl, ne’ebé fó kompetensia ba Ministériu Justisa, liuhosi Diresaun Jerál Servisu Rejistu Notariadu hala’o kna’ar  autentikasaun ba pedidu inskrisaun partidu foun sira.

Ministru Justisa, Tiago Amaral Sarmento, informa MJ aprova ona  kandidatu Partidu Os Verdes nia pedidu atu rejistu iha Ministeriu Justisa liuhosi Diresaun Jerál Rejistu no Notariadu tanba prenxe ona rekezitu inskrisaun ho apoiante 20.000.

Ministru Justisa, Tiago Amaral Sarmento. Imajen Tatoli/Francisco Sony

“Iha verifikasaun ne’e sira (DJRN) konklui katak elezivel ona Partidu Os Verdes rejistu ona iha Ministériu Justisa tanba prenxe ona rekezitu ho apoiante 20.000-resin. Ho ida ne’e hatudu ona katak partidu Os Verdes atu kontinua ba rejistu iha Tribunál Rekursu,” Ministru Justisa (MJ), Tiago Amaral Sarmento, Ministru Tiago Amarál, hateten ba jornalista sira hafoin simu audénsia ho ekipa kandidatu Partidu Os Verdes de Timor iha nia-gabinete-Caicoli,tersa  ne’e.

Tuir lejizlasaun, hafoin Ministériu Justisa halo autentikasaun no aprova pedidu kandidatu partidu polítiku ne’e iha prazu loron rua nia-laran, haruka dokumentu hotu partidu Os Verdes ba iha Tribunál Rekursu atu hetan legalidade.

“Ami iha loron rua hahú ohin ka bele aban atu haruka dokumentu hotu-hotu Os Verdes nian ba Tribunál Rekursu. Nune’e Tribunal Rekusu bele proklama tuir nia kompetensia atu Os Verdes bele hetan legalidade sai partidu politiku ida ne’ebe mak loloos,” Governante ne’e akresenta.

Ministru Tiago informa Ministru Justisa sesante Manuel Cárceres indefere diretamente re-inskrisaun kandidatu partidu Os Verdes de Timor iha loron 11 juñu 2021 no iha fulan-fevereiru 2022.

Tanba tuir lei partidu politiku aprezenta totál apoiante too 20.000 no kompleta ho dokumentu hanesan Billete Identidade (BI) orijinál ka pasaporte, sertidaun batizmu, sertidaun nasimentu, sedula no la inklui kartaun eleitorál.

“Maibe Os Verdes la aprezenta dokumentu refere no sira só aprezenta kartaun eleitorál de’it ho apoiante 10.000, tanba ne’e la prenxe rekezitu, nune’e Ministu Justisa sesante (Manuel Cárceres) indefere, maibé agora prenze rekezitu no hetan ona aprovasaun,” Ministru Justisa ne’e esplika.

Iha fatin hanesan, Sekretáriu Nasionál kandidatu Partidu Os Verdes de Timor, Carlos Martins, hateten nia parte sente kontente no apresia tebes ba Ministru Justisa, Tiago Amaral Sarmento, tanba koopera ho Os Verdes hodi aseita atu rejista kandidatu partidu refere.

Sekretáriu Nasionál Partidu Os Verdes, Carlos Martins. Imajen Tatoli/Francisco Sony

“Ami apresia tebes ho Ministru Justisa nia laran luak bele aseita ona ami nian rejistu, ida ne’e ami apresia tebes,” nia akkresenta.

Os Verdes prenxe rekezitu tuir lei partidu polítiku númeru 3/2004, 14 abríl ne’ebé previstu iha artigu 13 kona-ba rekizitu ba inskrisaun.

Tanba ne’e, apoiante maihosi munisípiu hotu  hamutuk 20.000, hosi númeru ne’e apoiante hosi kada munisipiu kuaze 1.000, ne’ebe kompleta kedan ho dokumentu komprovasaun identidade ba rekerente liuhosi fotokópia autentikada hanesan BI, ou passaporte nasional, ou sertidaun nascimentu, ou sédula pessoal, ou da sertidaun batismu, ou sertidaun kazamentu.

Alende ne’e, iha ona dokumentu komprovativu sira hanesan estatutu, programa, denominasaun, sigla, bandeira, emblema no hino partidu.

Notísia relevante:  Ministru Justisa indefere direitamente kandidatu partidu Os Verdes

Jornalista: Natalino Costa

Editór      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here