Komandante PNTL Munisípiu Bobonaro, Superintendente Antoninho Mauluta. Imajen Tatoli/Sérgio da Cruz.

BOBONARO, 05 abríl 2022 (TATOLI) – Polísia Nasionál Timor-Leste (PNTL)  hosi komandu munisípiu kontinua hamriik firme atu asegura kampaña eleitorál ba eleisaun prezidensiál volta daruak períodu 2022 to’o 2027.

“Ami enkontru ona ho parte hotu-hotu hodi garante seguransa iha kampaña eleitorál segunda ronde nian, komandu PNTL garante katak buat hotu-hotu sei la’o di’ak tanba ita sei hetan kooperasaun hosi parte hotu-hotu,” Komandante PNTL Bobonaro, Superintendente Antoninho Mauluta informa ba jornalista sira, iha Maliana, segunda ne’e.

Daudaun ne’e komandu PNTL diskute ona planu operasaun ba kampaña eleitorál volta daruak ho komandante eskuadra sira atu akompaña direita apoiante kandidatu Prezidente Repúblika sira- ne’ebé atu partisipa kampaña.

Komandu PNTL Munisípiu Bobonaro mós koordena ho Sekretariadu Tékniku Administrasaun Eleitorál (STAE) no Komisaun Nasionál Eleisaun (CNE, sigla portugés) serbisu hamutuk ho komandante eskuadra sira atu tún ba iha baze halo sorumutu ho ekipa susesu kandidatu PR na’in-rua hodi diskute kona-ba prosesu kampaña atubele kumpre regra kampaña no regra tránzitu ninian.

“Seguransa la’ós PNTL de’it tanba munisípiu Bobonaro la’ós polísia nian mesak. Ne’e duni atu garante kampaña eleitorál la’o ho susesu ita hotu-hotu nu’udar Bobonaro oan tenke hamrik hamutuk rona malu, konsidera malu no fiar malu atubele fó susesu kampaña ne’e hodi lori naran di’ak Bobonaro ba tau iha nasionál,” nia apela.

Totál membru efetivu ne’ebé preparadu atu aseguran seguransa ba kampaña eleitorál ne’e hamutuk na’in-144 tanba ne’e husu ba apoiante no militante partidu sira atu respeita nafatin regra no dekretu-lei kódigu estrada nune’e bele preve-aan  hosi risku asidente.

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here