Diretór Jerál Administrasaun Finansa MESSK, Hernânio Viterbo da Costa Soares. Imagen TATOLI/Sérgio da Cruz

DILI, 05 abril 2022 (TATOLI)–Ministériu Ensinu Superiór Siénsia no Kultura (MESSK) ninia progresu ezekusaun orsamentál ba tinan fiskál 2022, to’o loron 31 marsu, ein jerál atinje 34,3% ekivalente $967.782,09. 

“Bainhira haree loloos ba ezekusaun atuál, ami iha 18,3% maibé tanba tau tan ho obrigasaun 14,3%, nune’e hetan 33%, aumenta ho kompromisu maka ezekusaun orsamentu ba primeiru trimestrál atinje 34,3%,” Diretór Jerál Administrasaun Finansa MESSK, Hernânio Viterbo da Costa Soares, hateten iha ninia knaar fatin, Colmera, tersa ne’e.

Orsamentu 2022 ba MESSK hamutuk $5.186.739, fahe ba kategoria saláriu no Vensimentu $1.805.901, bens no servisu $2.871.838, transferénsia públika $ 314.000 kapitál menór laiha, no kapitál dezenvolvimentu $ 195.000.

Bazeia ba obrigasaun ministériu tenke ezekuta kontratu sira ne’ebé hein de’it atu halo pagamentu ho montante $741.964,20.

“Kuandu ita halo soma hamutuk ba obrigasaun no atuál, ita konsege ezekuta ona millaun $1,6 resin, ne’ebé ita tenke selu tanba kontratu ona,” nia akresenta.

Notísia relevante: MESSK ezekuta ona 30,5% OJE 2022

Aleinde ne’e, MESSK mós iha tan komormisu atu selu 1,3% ekivalente $67.655, nune’e saldu atuál purvolta millaun $3,4.

MESSK iha programa prioridade tolu hanesan boa governasaun, edukasaun no formasaun inklui kultura no patrimóniu, ne’ebé hosi programa edukasaun no formasaun implementa ona ‘Bolsa Hakbiit’, ba kultura halo levantamentu dadus ba uma lulik sira, halo kampaña nasionál ba promosaun arte kultura iha primeiru trimestre, maibé sei kontinua tan iha segundu trimestre.

Parte diresaun ezekuta programa sira tuir kornograma ministériu, tanba antes ne’e Ministru orienta ona kada trimestrál, diresaun ida-idak tenke iha ninia kornograma rasik, hosi primeiru trimestre to’o ramata tinan fiskál ne’e, diresaun ida-idak tenke responsabiliza ninia ezekusaun rasik.

“Tanba ne’e, ami ninia alvu ne’e kada semestre tenke ezekuta hotu programa tolu mínimu 25%, maibé hosi ami-nia kornograma ne’e balun ezekuta liu no balun menus, tanba balun ezekuta iha primeiru trimestre maibé balun iha segundu trimestre, ezemplu MESSK iha apoiu ida ba estudante sira atu halo atividade estudantíl iha universidade sira, ne’ebé sei iha hela prosesu tanba ministériu sei ko’alia ho universidade sira atu prepara proposta hodi hetan apoiu hosi ministériu,” Diretór esplika.

Foin lalais ne’e MESSK fó ona apoiu ba maluk defisiente sira ho orsamentu $25.000 atu sosa ekipamentu atu ajuda iha prosesu aprendizajen, ho nune’e sira bele iha kondisaun hakat ba Ensinu Superiór.

Jornalista : Tomé Amado

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here