MAP oferese fasilidade ba RAEOA reforsa produtividade produsaun agríkola. Imajen Tatoli/Abílio Elo Nini.

OÉ-CUSSE, 05 abríl 2022 (TATOLI) – Ministériu Agrikultura no Peska (MAP), tersa ne’e oferese fasilidade ba Sekretáriu Rejionál Asuntu agrikultura, hodi reforsa servisu agrikultura ba produtividade produsaun agríkola iha Rejiaun Administrativa Espesiál Oé-Cusse Ambeno (RAEOA).

Fasilidade ne’ebé MAP oferese hanesan, materiál kolleta (crop-cutting) ba hare-batar, legumes no GPS, adubu orgániku pocnasa, supernasa no harmonik ba demo área ektare 120 iha époka 2022 iha Oé-Cusse, inklui fini modo no pestisida.

Ministru Agrikultura no Peska, Pedro dos Reis, hatete, ministériu oferese ekipamentu ne’e atu ajuda servisu agrikultura, nune’e mantein polítika agrikultura rejionál atu hasa’e produtividade hodi asesu ba merkadu.

“Ohin mai entrega fasilidade atu fasilita agrikultura Oé-Cusse atu hala’o servisu ba crop-cuting, hands spayer, adubu no fini, mesmu kuantidade ne’e ki’ik, maibé ita espera ho fasilidade ne’ebé apoia ona, sei fó tulun tebes ita-nia agrikultór hodi dezenvolve di’ak liutan setór agrikultura iha Oé-Cusse,” Ministru Pedro Reis, ko’alia iha serimónia entrega ofisiál iha salaun agrikultura, Oé-Cusse.

Prezidente Autoridade RAEOA, Arsénio Paixão Bano, agradese ba Governu sentrál liuhosi MAP, ne’ebé tulun autoridade Oé-Cusse hodi kontinua hasa’e servisu agrikultura iha faze produsaun ba époka 2022.

“Ha’u agradese ba Governu sentrál tanba mai reforsa tán servisu agrikultura Oé-Cusse, ekipamentu importante tulun RAEOA atubele hametin tán servisu agrikultura, oinsá aumenta produsaun rai laran hodi minimiza dependénsia ba rai seluk iha futuru, tán ne’e ita neineik, maibé ita aumenta beibeik ita-nia produsaun agrikultura nian,” nia orgullu.

Sekretáriu Rejionál ba Asuntu agrikultura, José Eta, agradese ba Ministériu Agrikultura no Peska, tanba kada tinan oferese materiál crop-cuting no adubu hodi troka adubu kímiku ho adubu orgániku.

“Iha tinan ne’e tarjetu ba ektare 120 ne’ebé maka hetan apoia ona hosi diresaun agrikultura, maibé to’o fulan-abríl ne’e, ita atinje ona ektare 101 envolve benefisiáriu 266 família, mak hetan ona benefísiu tanba aplika adubu poknasa iha époka tinan ne’e, balu sei iha faze plantasaun, balu jenerativu no balu sei iha faze fegetativu,” José Eta afirma.

Nune’e, dadus provizóriu rezultadu produtvidade no área kultiva daudaun ne’e realiza ona iha sub-rejiaun Pante Makasar, rezultadu batar atinje 2,7 to’o 3,3 ton/ektare, hare rai-maran atine ona 1,3 ton/ektare, hare natar ka Prátika Agrikultura Di’ak (PAD), atinje 6,5 ton/ektare, no hare rai-metan aplika iha ektare 1,5, rezultadu produtividade hetan 5,7 ton.

Entretantu, dadus alimentár époka 2021, ba área natar kultiva ektare 4,597, no área kolleta ektare 4,485, ba área batar époka 2021 área kultiva ektare 6,596 área kolleta 6,567, no rezultadu produsaun haree kulit iha Oé-Cusse purvolta tonelada rihun 17 envolve haree rai maran no natar, ekivalente tonelada rihun 10 sai foos, ba produsaun batar nia produsaun iha Oé-Cusse hamutuk tonelada rihun 10.

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here