MAP apoia ai-oan 6000 refloresta no konserva bee-matan 114 iha Oé-Cusse. Imajen Tatoli/Abílio Elo Nini.

OÉ-CUSSE, 05 abríl 2022 (TATOLI) – Ministériu Agrikultura no Peska (MAP), tersa ne’e apoia ai-oan hamutuk 6000 ba autoridade Rejiaun Administrativa Espesiál Oé-Cusse Ambeno (RAEOA) hodi refloresta no halo konservasaun ba bee-matan 114 iha rejiaun ne’e.

“Iha janeiru MAP apoiu rihun-neen, ohin ita mós ita apoia tán, ha’u ko’alia ona ho prezidente autoridade atu haree kuda iha alvu ba bee-matan sira-ne’ebé konserva ona iha tinan kotuk hamutuk 114 atu proteje daudaun,” Ministru MAP, Pedro dos Reis, dehan ba Agência Tatoli iha Oé-Cusse.

Tuir nia, ai-oan ne’ebé MAP oferese ho espésie oinoin la inklui ai-teka, tán ne’e maka MAP orienta autoridade-sira, iha tempu badak ai-teka sira iha Oé-Cusse sei tesi hotu, depois diresaun floresta nasionál sei haree apoia tán ai ne’ebé maka prodús bee ba bee-matan sira, tanba ai-teka estraga debitu bee menus.

Prezidente Autoridade RAEOA, Arsénio Paixão Bano, hatete, iha 2021 autoridade RAEOA deskuti ona ho autoridade komunitáriu, atu oferese rai ektare 1 ba diresaun agrikultura, hodi halo konservasaun bee-matan no rai hotU-hotu, tanba Oé-Cusse problema barak iha bee-moos.

“Iha Oé-Cusse prepara ona sentru viveru iha sub-rejiaun sira, no hatudu ona rezultadu, rejiaun mós produs ai-oan, entau ita tenke aumenta tanba ita-nia rai ne’e loloos 30% Oé-Cusse iha ai-hun barak, foho sira sei mamuk, ita-nia persentajen só 14% de’it ba totál rai ne’ebé persiza kuda ai-barak, ita laran barak entaun presiza 16% atu kuda barak tán,” nia katak.

Tuir ezekutivu ne’e katak, Oé-Cusse tinan rua liuba enfrenta krize bee-moos, entaun tenke proteje-aan, prepara agora ba tinan 10 mai, tanba ne’e nu’udar nia agradese ba MAP ho diresaun agrikultura, tanba esforsu ona desde tinan kotuk to’o ohin ona kuda ai-oan iha konserva bee-matan 114, to’o agora sei kontinua nafatin.

Sekretáriu Rejionál ba Asuntu Agrikultura, José Eta, hatete, diresaun agrikultura kuda ona ai-oan rihun 18 ba bee-matan 114 liuhosi programa food for work.

“Ita-nia esperansa ba futuru maka refloresta ita-nia rejiaun, tán ne’e ita konserva bee-matan sira 114 ho área konservasaun ektare 100,80, kuda ona ai-oan rihun 18, ne’ebé durante ne’e autoridade konserva liuhosi programa food for work, realiza ba iha sub-rejiaun haat,” José Eta informa.

José Eta, fó-sai, espésie ai-oan ne’ebé autoridade distribui ona iha inísiu dezembru 2021 hamutuk 23, hanesan abokate, sabraka, samtuku, bua, au, rambutan,dragon, kamí, kakau, vetiver, grass, mahoni, jambu, hali-portu, figus, ai-kameli, ai-nitas, kulu-jaka, malus, nimba no nú.

Entretantu, ai-oan rihun neen, ne’ebé MAP oferese ba autoridade mak hanesan, kulu-jaka, mahoni, avokate, sabraka, has no kakau.

Jornalista    : Abílio Elo Nini
Editór            : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here