Biodiversidade iha tasi Timor. Imajen/Konservasaun Internasional

DILI, 05 abril 2022 (TATOLI)—Organizasaun Naun Governamentál, Konservasaun Internasionál Timor-Leste deskobre ona iha espesie ikan ne’ebé moris iha ahu-ruin ka depende ba ahu-ruin hamutuk 840.

“Bazeia ba survey ne’ebé mak ami halo, ita alista ona espesie ikan ahu-ruin iha Timor-Leste hamutuk 840 ba kategoria família 61 no jéniu 234, tuir predisaun sientísta sira katak espesie ne’e bele to’o 1.232,” Jestór Programa Biodiversidade Mariña, Ancelmo Lopes Amaral, hateten ba Agência TATOLI, iha ninia knaar fatin, Bebora.

Notísia relevante: Konservasaun internasionál entrega motorizada ba guarda-florestál parke Nino Konis Santana

Hosi espesie 840, ho kategoria família 61 ne’ebé mak identifika iha Timor-Leste, iha família tolu mak barak liu hanesan Labridae Wrasses ho totál espesie  104, Pomacentridae (damselfishes or ray-finned fish) espesie 94, Gobiidae (true gobies) espesie 89, no espesie seluk menus hosi 80 mai kraik.

Nia dehan, durante ne’e Konservasaun Internasionál halo ona Programa Avaliasaun Rápida Mariña (PARM) dala-tolu, hahú hosi tinan 2009, ne’ebé mak kobre iha área parke nasionál Nino Konis Santana, munisípiu Lautém to’o tama Dili.

PARM daruak halo iha tinan 2012, ne’ebé fasilita hosi Konservasaun Internasionál, hamutuk ho ekipa sientísta hosi Estadu Unidu Amérika  (UUA), Indonézia no Austrália, inklui Ministériu Aagrikultura no Peska (MAP) liuhosi Diresaun Nasional Peska.

“PARM datoluk halo iha tinan 2016, ita kontinua ka atualiza de’it informasaun no dadus ne’ebé ita hetan iha tinan 2012,  entaun survey datoluk ba biodiversidade, liuliu ba ahu-ruin no ikan ahu-ruin iha Timor-Leste, kada fatin ida identifika iha espesie 60 ba leten no boot liu mak espesie 300,” nia dehan.

Konservasaun Internasionál halo survey iha Ataúro ba fatin sanulu, ne’ebé hosi fatin sira ne’e, espesie boot liu ne’ebé sira deskobre mak 318, bazeia ba survey ikus iha tinan 2016 no hatudu katak espesie menus iha fatin ne’ebé livre peska iha Ataúro.

Objetivu PARM mak atu hatene situasaun no kondisaun biodiversidade ahu-ruin no ikan ahu-ruin, nune’e bele halo rekomendasaun ba Governu bazeia ba rezultadu survey.

“Iha tipu ikan barak mak ita seidauk deskobre iha ita-nia rai, maibé iha illa kiik sira ne’ebé besik Timor-Leste, hanesan iha Indonézia parte sunda banda, Lesser Sunda, Kupang no ambon hetan ona epesie liu 1.232,” nia informa. 

Nune’e mós, Konservasaun Internasionál deskobre espesie foun iha Timor-Leste hamutuk ualu, ne’ebé ikan sira ne’e foun no naran sedauk iha.

“Espesialista sira lori espesie ikan sira ba Muzeu Austrália no ida mak sira tau tuir ita-nia Saudozu Nino Konis Santana nia-naran, Eviota Santanae, no espesie foun ida hosi Ataúro bolu tuir Ramos Horta nia-naran Hortinedae. Entaun naran sira ne’e fó iha muzeu Austrália,” Jestór programa tenik.

Espesie sira haruka ba Austália atu identifika no tau naran, nune’e rai no karik aban bainrua Timor-Leste iha muzeu ba animál mak bele lori fila mai Timór.

“Bazeia ba survey iha Timor-Leste, espesie ne’ebé ameasa atu lakon mak hanesan Lucanidae no Rat Grouper, ne’ebé hela de’it ikan ida mesak ona, hetan iha Tasi-Tolu, ikan tuberaun ka hummerhead shark, durante survey hetan de’it ida, no espesie  grupu ne’e oituan de’it, ho medida menus hosi sentimentru 10 mai kraik,” nia salienta.

Jornalista : Armindsa Fonseca

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here