Primeira-Ministra Interina, Armanda Berta dos Santos. Imajen Tatoli/António Dasiparu.

DILI, 05 abríl 2022 (TATOLI)—Primeira-Ministra Interina no Ministra Solidariedade Sosiál no Inkluzaun (MSSI), Berta dos Santos, hateten Governu Timor-Leste hamutuk ho parseiru internasionál buka mekanizmu no diskute hodi responde risku dezastre naturál iha Timor-Leste.

“Semináriu ida-ne’e mak atu fortalese entidade sira hotu nia kontribuisaun, nune’e hodi bele reforsa liután iha liña koordenasaun entre ajente Protesaun Sivíl  sira hotu, Liña Ministeriál no parseiru públiku no privadu. Tanba laiha dalan seluk hodi atinje objetivu no meta sira iha implementasaun polítika Protesaun Sivíl nian, nune’e ita tenki hametin di’ak liután ita-nia liña koordenasaun ho Autoridade Protesaun Sivíl hodi responde ba asidente boot ka dezastre naturál ne’ebé bele mosu iha kualker momentu,” MSSI hateten iha semináriu Otél Timor, Dili, tersa ne’e.

Tanba ne’e, tenke foka no esforsu liuhosi dezenvolvimentu infraestrutura ne’ebé adekuadu, hola ekipamentu ho kualidade, fó formasaun ne’ebé di’ak ba profisionál sira no kria mós planu atu bele prevene risku sira hotu.

“Ita hakarak Protesaun Sivíl ida-ne’ebé kontinua fó kontribuisaun ne’ebé diak ba seguransa nasionál hanesan parte importante ba dezenvolvimentu, liu-liu iha área protesaun no sokoru. Bainhira mosu asidente bo’ot fó mós seguransa ba patrimóniu públiku no prevene mós konflitu komunitária hodi kontribui ba kooperasaun nasionál no internasionál, hamutuk ho nasaun hirak ne’ebé desde uluk to agora sai nu’udar parseira no amigu ne’ebé di’ak tebes hanesan Estadu Unidu Amerika, Nova Zelandia, Japaun, Korea do Sul, China, Indonézia, Austrália, Portugal no seluk tán,” nia dehan.

Nia dehan, nasaun hirak-ne’e mak fó ona kontribuisaun hodi aumenta seguransa no proteje sidadaun sira hotu hanesan mós organizasaun naun governamentál, Organizasaun Nasaun Unida (ONU), Uniaun Europeia (UE), Comunidade das Paises da Lingua Portuguêsa (CPLP), Association of South East Asian Nation (ASEAN) no Comunidades das Ilhas Pasifico sira. 

Primiera-Ministra Interina, Armanda Berta dos Santos, akompaña hosi SEPS Joaquim Gusmao, Embaixadór Austrália iha Timor-Leste ho representante WFP baku babadok bainhira partisipa iha Semináriu Internasionál protesaun sivil iha Hotel Timor, tersa (05/4/). Imajen Tatoli/Antonio Dasiparu.

Sekretáriu Estadu Protesaun Sivil (SEPS), Joaquim José Gusmão dos Reis Martins, apresia ho Governu Austrália liuhosi embaixada no forsa armada América ne’ebé servisu di’ak tebes ho SEPS hodi bele hamosu planu dezenvolve no dezeña inisiativa nune’e bele realiza no implementa serimónia internasionál hahú ohin.

SEPS mós kompromitidu atu kria investimentu iha área dezenvolvimentu kapitál umanu hodi bele estabelese sistema ne’ebé apropriadu bazea ba padraun internasionál, aleinde ne’e SEPS mós hakarak konstrui fasilidade ne’ebé integradu hodi bele responde ba servisu operasionál tantu iha baze no iha nasionál.

“Ita presiza iha koordenasaun no komunikasaun entre entidade hotu no indivídu inklui internasionál ho korpu diplomata sira mak sai mekanizmu ne’ebé di’ak hodi asegura kooperasaun no responsabiliza ne’ebé di’ak ho efetivu,” nia dehan.

Embaxadór Austrália iha Timor-Leste, Bill Costello, hateten ho asuntu ne’e Austrália kontinua serbisu makaas hodi apoiu Timor-Leste hodi responde ba dezastre naturál ne’ebé akontese iha abríl tinan kotuk no COVID-19.

“Nasaun rua ne’e aprende lisaun hamutuk atu oinsá mak bele kontribui ba preparasaun hasoru dezastre naturál ho dalan olistika. Nune’e ha’u hakarak ida-ne’e tau importánsia liu-liu fo protesaun ba gurpu ne’ebe mak vulnerável liu iha ita-nia sosiedade, inklui labarik, idozu, difisiente, no ema mukit sira. Grupu sira-ne’e mak afeta makaas liu bainhira hetan dezastre naturál,” Bill dehan.

Inséndiu boot ida-ne’ebé akontese iha tinan 2019 no inundasaun akontese iha marsu tinan 2020 no 04 abríl tinan 2021, ne’ebé mak estraga makaas tebes iha teritóriu no rezulta ema mate hamutuk 46 no lakon hamutuk 12.

Jornalista : Osória Marques

Editór      : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here