Vise-Ministru Administrasaun Estatal, Lino de Jesus Torrezão, ofisialmente entrega ekipamentu eletrónika ba reprezentante xefe suku hosi postu administrativu Cailaco, munisípiu Bobonaro. Imajen Tatoli/Sergio da Cruz.

BOBONARO, 05 abríl 2022 (TATOLI)- Governu liuhosi Ministériu Administrasaun Estatál (MAE) ,tersa ne’e distribui ekipamentu eletrónika ba xefe suku sira iha munisípiu Bobonaro.

Ekipamentu eletrónika ne’ebé distribui ba suku 50 ne’ebé perténsia ba postu administrativu neen kompostu hosi Atabae, Balibo, Cailaco, Maliana, Bobonaro no Lolotoe. Ekipamentu eletrónika ne’e mak hanesan komputadór kompleta ho CPU no mákina imprime.

Vise-Ministru Administrasaun Estatal, lino de Jesus Torrezão, hateten, objetivu hosi distribuisaun ekipamentu eletrónika hirak-ne’e atu fasilita no moderniza serbisu atendimentu administrasaun suku hosi sistema manuál ba sistema eletrónika hodi entrodús baze dadus monografia suku ba komputadór.

Ekipa Ministériu Administrasaun Estatal distribui ekipamentu eletrónika ba xefe suku sira iha munisípiu Bobonaro. Imajen Tatoli/Sérgio da Cruz.

Tanba governu hakarak lori informasaun eletrónika to’o iha suku hodi fó koñesimentu ba autoridade lokál sira atu adota era globalizasaun oinsá mak bele utiliza komputadór.

“Antes atu utiliza materál hirak-ne’e PAS sira sei ba hetan formasaun atubele fó asisténsia téknika hosi Ministériu Administrasaun Estatál oinsa bele halo operasaun ba komputadór sira-ne’e, tanba ne’e husu ba xefe suku sira katak komputadór hirak-ne’e tenke entrega direitamente ba pesoál atendimentu suku sira mak sei kaer hodi halo serbisu ba komunidade,” Governante ne’e hatene iha nia intervensaun iha Bobonaro.

Maske nune’e ezekutivu ne’e mós promete ba oin governu planeia apoia tán solár painel tanba daudaun ne’e sede suku barak iha territóriu nasionál seidauk asesu eletrisidada no sei koordena mós ho Ministériu Obra Públika (MOP) atu haree kestaun nune’e bele hatama ona iha planu Orsamentu Jeral Estadu tinan oin nune’e fasilidade hirak-ne’e bele funsiona ho di’ak.

Kona-ba manutensaun ba ekipamentu hirak-ne’e, governante ne’e dehan autoridade lokál sira utiliza de’it orsamentu operasionál ne’ebé kada fulan hetan $50 no bainhira estragu grave liu kompeténsia autoridade munisipál sira mak hadi’a.

Sekretáriu Autoridade Munisípiu Bobonaro, João Fátima do Carmo, agradese no louva governu tanba iha inisiativa di’ak tebes atu hakma’an líder komunitária sira-nia preokupasaun relasaun ho servisu administrasaun públiku iha nível suku.

“Materiál hirak-ne’e fó ba ita-boot sira atu hakbiit serbisu atendimentu ba komunidade sira lokál ligadu ho atividade balun, ita-boot sira mós presiza duni atu uza komputadór, ne’e duni utiliza didi’ak materiál hirak-ne’e, kuidadu didi’ak tamba sasán sira-ne’e sosa hodi osan povu nian entaun nia benefísiu tenke ba povu,” nia apela.

Xefe Suku Saburai, Postu administrativu Maliana,Viçente dos Santos, sente kontente ho apoia ne’e maski durante ne’e tinan barak halo atendimentu administrasaun ba komunuidade sira utiliza de’it sistema manuál no ba imprime dukumentu sira iha rentál.

“Ami-nia suku rasik tinan 20-resin ona seidauk asesu eletrisidade, entaun obrigatóriu ami rai de’it iha administrasaun postu bainhira ami presiza mak foin mai asesu, tanba komputadór sira-ne’e atu uza ita liga ba ahi la’ós ba buat seluk,” nia katak.

Totál orsamentu ne’ebé MAE prevee  hodi sosa materiál hirak-ne’e ba suku hamutuk 452 iha territóriu lnasionál kuaze gasta  rihun $600 hosi Orsamentu Jerál Estadu (OJE) tinan 2021.

Jornalista         : Sérgio da Cruz

Editór               : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here