Mediku sira vasina Pfizer Covid-19 ba estudante sira iha Dili 30/11/2021.Imajen TATOLI/Antonio Dasiparu.

COVALIMA, 05 abril 2022 (TATOLI)—Responsável  postu saúde Ogues, Carlos da Cunha Moniz, informa estudante hosi Eskola Bázika Sentrál (EBC, sigla portugés) Ogues no eskola Téknika Vokasionál Cristál na’in-318 simu ona imunizasaun vasina Pfizer doze dahuluk.

“Vasinasaun ba estudante sira ho idade 12 to’o 18 iha loron 31 fulan marsu ne’e, estudante sira ne’ebé simu ona vasina doze dahuluk hamutuk na’in-318 ne’e kompostu hosi estudante hosi Eskola Bázika Sentrál Ogues no Eskola Tékniku Bokasionál Cristal,” Carlos da Cunha informa ba Agência Tatoli, iha salaun administrasaun Covalima, Kampung Baru, tersa ne’e.

Estudante na’in-318 ne’e mai hosi Eskola Bázika Sentrál Ogues hamutuk na’in-249 ne’ebé kompostu hosi mane 123 no feto 126 no estudante hosi Eskola Téknika Vokasionál Cristál hamutuk na’in-69 ne’ebé kompostu hosi feto 44 no mane 25.

“Durante ne’e, ami pesoál saúde simu kritika hosi estudante sira-nia inan-aman, maibé ami halo esplikasaun ba sira kona-ba benefisiu hosi vasina atu prevene oan sira hosi moras COVID-19 ne’ebé agora daudaun mundu preokupa,” nia relata.

Maske pesoál saúde simu kritíka hosi estudante sira-nia inan-aman maibé pesoál saúde sira kontinua hala’o sira-nia servisu hodi halo imunizasaun vasina Pfizer doze dahuluk ba estudante sira hodi bele prevene transmisaun COVID-19.

Antes ne’e, iha loron 17 fulan-marsu tinan ne’e, Diretora Servisu Saúde Covalima, Maria Fátima Moniz hateten, servisu saúde distribui ona vasina Pfizer ba postu administrativu sira hanesan postu Fatumea vial (frasku) 13, Fatululik vial 10, Fohorem vial 10, Maucatar 14, Suai Vila 88, Tilomar vial 28 no postu Administrativu Zumalai vial 20.

Ho nune’e, estoke vasina Pfizer ne’ebé servisu saúde Covalima simu hosi Governu sentrál iha nasionál hamutuk vial 200 ne’ebé distribui ona ba sentru saúde hitu (7) iha munisípiu Covalima.

Jornalista : Celestina Teles

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here