Estudante Eskola ESJ 04 setembru UNAMET Balide. Imajen TATOLI/António Gonçalves

DILI, 05 abril 2022 (TATOLI)–Eskola Ensinu Sekundáriu Jerál (ESJ) 04 setembru UNAMET, Balide, iha tempu besik sei submete diploma estudante finalista tinan akadémiku 2021 hamutuk 1.200 resin ba Diretór Servisu Edukasaun Dili (DSED) sesante, Duarte Braganza, atu asina.

“Daudaun ami prienxe hela valór ba diploma estudante sira, bainhira hotu ona, eskola sei entrega mai ha’u hodi lori ba Diretór sesante atu hetan ninia asinatura,” Diretór ESJ 04 setembru UNAMET, Sérgio da Cruz, hateten, iha ninia knaaar fatin, Balide, tersa ne’e

Nia dehan, atribuisaun diploma ba estudante tarde oituan tanba mosu dezentendimentu iha Servisu Edukasaun Dili, tanba kompeténsia atu asina diploma estudante refere ba Diretór sesante, maibé antes ne’e nia rejeita lakohi asina tanba razaun mandatu ramata molok hahú ezame nasionál, tanba ne’e nia lakohi foti risku atu halo serbisu ne’e.

Notísia relevante: DSED sesante asina ona diploma estudante hosi eskola ualu

“Maibé Graça à Deus parese iha ona desizaun ruma, tanba ne’e ami simu ona orientasaun atu prenxe valór estudante sira-nia ne’e atu lalais submete ba Servisu Munisípiu Dili hodi hetan asinatura hosi Diretór sesante,” nia akresenta.

Iha sorin seluk, Diretór eskola ne’e informa kona-ba ezame primeiru trimestrál ba estudante sei realiza fali iha loron 25 abril 2021, bazeia ba despaixu ministeriál.

“Ne’e duni parte eskola halo daudaun ona preparasaun, hahú iha loron 01 abril 2021 profesór sira hotu tenke submete pontu ezame mai eskola hodi prepara ona elaborasaun. Portantu totál estudante ne’ebé atu tuir ezame ne’e hamutuk 3.982,” nia informa.

Iha loron 13 dezembru 2021, estudante finalista hamutuk 58.224 iha territóriu nasionál partisipa ezame nasionál, kompostu hosi estudante Ensinu Báziku 31.143, Ensinu Sekundáriu 22.223, Ensinu Sekundáriu Tékniku Vokasionál 4.858, enkuantu hosi Dili de’it iha totál estudante 16.752.

Nune’e, iha loron 20 janeiru 2022, Menistériu Edukasaun Juventude no Desportu (MEJD) anunsia rezultadu ezame nasionál hosi Eskola Ensinu Báziku no Ensinu Sekundáriu iha territóriu tomak, ne’ebé hatudu katak na’in-18 mak la pasa no 50.752 aprovadu, kompostu hosi estudante Ensinu Báziku 31.143 no Ensinu Sekundáriu 22.223.

Diretór Servisu Edukasaun munisípiu Dili, Duarte Braganza inklui Diretór Servisu Edukasaun munisipál haat seluk hetan ona ezonerasaun, enkuantu naran iha diploma nível Sekundáriu Jerál no Tékniku Vokasionál tinan akadémiku 2021 uza sira-nia naran.

Mandatu Duarte Braganza loloos termina iha loron loron 31 dezembru 2021, maibé tanba mosu desizaun polítika, MEJD hasai despaixu ezonerasaun iha loron 31 outubru 2021 hodi nomea fali Carlito da Silva nu’udar Diretór Servisu Edukasaun Munisípiu Dili foun.

Jornalista : Tomé Amado

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here