Komandante PNTL Munisípiu Bobonaro, Superintendente Antoninho Mauluta. Imajen Tatoli/Sérgio da Cruz.

BOBONARO, 04 abríl 2022 (TATOLI) —  Polísia Nasionál Timor-leste (PNTL)  Komandu Munisípiu Bobonaro segunda ne’e halo avaliasaun serbisu durante kampaña eleitorál no eleisaun prezidensial volta dahuluk ne’ebé realiza iha loron 19 fulan-marsu tinan 2022 liubá.

Komandante PNTL Munisípiu Bobonaro, Superintendente Antoninho Mauluta, informa avaliasaun ne’e envolve forsa seguransa sira hosi komandu Unidade Patrullamentu Fronteira (UPF) Batalhão Ordem Públika (BOP) no FALINTIL-Forsa Defeza Timor-leste (F-FDTL) ne’ebé mak durante ne’e fó seguransa másima ba festa demokrasia ne’e.

“Ami konvoka enkontru ida ohin atu avalia fila-fali buat ne’ebé ita halo di’ak ona no buat ne’ebé ita halo seidauk di’ak karik, agora ba oin ita atu hadi’a hamutuk ba oin hodi preparasaun ba seguransa iha kampaña no eleisaun iha segunda volta nian,” nia informa jornalista sira, iha kna’ar fatin segunda ne’e.

Superintendente ne’e esplika, avaliasaun ne’e atu hatutan de’it orientasaun komandu jerál PNTL nia oinsá atu orienta komandante eskuadra no membru sira bainhira presta serbisu iha festa demokrasia, tenke tuir planu operasaun komandu no orden ne’ebé iha nune’e  garante festa demokrasi ne’e la’o kontroladu.

Durante kampaña no eleisaun volta dahuluk komandu PNTL Bobonaro hasoru difikuldade kona-ba transporte tanba proposta manutensaun reparasaun ne’ebé submete ba komandu jerál la aprova nune’e difikulta membru sira atu ba fó seguransa ba materiál eleisaun iha sentru votasaun sira ne’ebé iha área rurál.

Nune’e mós difikuldade kona-ba membru efetivu la sufisiente, tanba antes ne’e planu komandu munisípiu nia atu koloka memebru na’in-rua mak fó seguransa ba materiál eleisaun kada sentru votasaun, maibé momentu ne’ebá komandu jerál aprova apoia de’it membru na’in-25.

“Maski área ne’ebé ita konsidera risku maibé obrigatóriu ita koloka de’it ema na’in-ida nomoos balu feto tán ita koloka iha área sira la asesu eletrisidade, maibé ita agradese durante eleisaun membru ira konsege fó susesu ba prosesu eleisaun to’o remata,” nia afirma.

Purtantu foin lalais ne’e membru efetivu komandu PNTL Bobonaro hamutuk na’in-144 koloka iha sentru votasaun 130 no estasaun votu hamutuk 150 iha postu administrativu Atabae, Balibo, Cailaco, Maliana, Bobonaro no postu administrativu Lolotoe.

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here