Diretor PNDS Covalima,Filipe Cardoso. Imajen Tatoli,Celestina Teles.

COVALIMA, 04 abríl 2022 (TATOLI)—Governu liuhosi Programa Nasionál Dezenvolvimentu Suku (PNDS) liu-liu tékniku no enjineiru sira sei halo levantamentu ba rai atu konstrui Uma Kbiit Laek (UKL) ba iha faze daruak iha munisípiu Covalima.

Notísia Relevante: Tinan 2022: PNDS sei konstrui “Uma Kbiit Laek” 278 iha Covalima

“Atividade Programa Nasionál Dezenvolvimentu Suku (PNDS), ba tinan 2022 ita sei konstrui UKL ho unidade 278 ne’ebé faze implementasaun to’o ona levantamentu tékniku ba iha uma fatin ne’ebé atu konstrui ba benefisiáriu ne’ebé elizivél simu uma refere,” Diretór PNDS Covalima, Filipe Cardoso, hato’o ba Agencia Tatoli iha nia knar fatin, Kampung Baru, segunda ne’e.

Atu halo implementasaun ba konstrusaun UKL iha Covalima, tékniku PNDS sei iha faze identifikasaun no levantamentu ho númeru UKL unidade 278, liga ho forsa traballu enjineiru no tékniku PNDS Covalima ne’ebé menus maibé hetan apoiu hosi PNDS nasionál no parseiru sira.

“Hafoin prosesu tékniku levantamentu bazea ba ida-ne’e, ita foin prepara dezeñu Planta no kadernu Enkargu (BoQ) hodi halo estimasaun kustu orsamentu ita hakarak faze tuir mai asina akordu implementasaun hodi submete ba Ministériu Finansa (MF), hahú prosesa orsamentu no orsamentu transferidu ekipa bele hahú ona implementasaun,” nia dehan.

Orsamentu ba konstrusaun Uma Kbiit Laek (UKL) ho unidade 278 ne’e, seidauk bele fó sai tanba tékniku no enjineiru PNDS sei iha faze prosesu levantamentu rai hodi konstrui UKL ba benefisiariu sira.

“Ha’u seidauk bele mensiona fundu infraestrtura konstrusaun UKL ho unidade 278,” nia dehan.

Tanba ne’e, nia dehan, bazea rezultadu hosi levantamentu foin bele klasifika orsamentu, tipu uma ho medida 37 metru kuadradu kuartu rua ho nia orsamentu masímu $14,000 to’o $15,000 no tipu uma 48 metru kuadradu kuartu tolu ho nia orsamentu másímu $17,000 hodi bele hatene tipu medida uma.

Enkuantu, ekipa PNDS sei konstrui Uma Kbiit Lek unidade 278 ne’e sei implementa iha postu administrativu hitu (7), suku 30 iha munisípiu Covalima.

Jornalista : Celestina Teles

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here