Komunidade Manufahi, Luís Bauk Taek. Imajen Tatoli/Nelson de Sousa.

MANUFAHI, 04 abríl 2022 (TATOLI)—Komunidade iha munisípiu Manufahi, Luís Bauk Taek, iha mehi no iha esperansa ba kandidatu Prezidente Repúblika foun períodu 2022-2027 ne’ebé eleitu sai Xefe Estadu sei fó atensaun ba povu iha territóriu nasionál nia moris di’ak.

“Ami-nia esperansa ne’e, Prezidente Repúblika ida simu nia knar hein loos mak hamutuk ho Governu oinsá tau atensaun ba povu nia moris di’ak hodi hadi’a estrada ka dalan ba suku sira, tanba povu atu faan produtu ruma dalan mak defisil. Tinan 20 ida-ne’e mak ita la koko haree no mós presiza dada bee-moos, hakbiit tan mós agrikultura bele haree ba floresta, veternaria, pekuária tenke servisu efetivu,” Luís Bauk Taek hateten ba Agência Tatoli, iha salaun parokial Same Vila bainhira partisipa diálogu entre kandidadu Prezidente Repúblika períodu 2022-2027 ho númeru sorteiu 2, Francisco Guterres Lú Olo ho komunidade Munisípiu Manufahi, segunda ne’e.

Iha área edukasaun, nia dehan, durante tinan 20 la’o baze ladún metin tanba orsamentu jerál Estadu aloka kada tinan pursentu kiik hodi labele rezolve buat hotu liga ba oinsá fasilita manorin-na’in no oinsá atu halo konstrusaun insfraestrutura eskola, tan ne’e Xefe Estadu foun presiza koordena ho Governu tau atensaun.

Ho ida ne’e, Prezidente Repúblika ida mai atu halo nesesita duni povu no hakuak ema hotu hala’o knar kumpre ba konstituisaun, nune’e ema hotu hola parte demokrasia aberta iha prosesu dezenvolvimentu.

Hanesan sidadaun observa durante ne’e iha prosesu dezenvolvimentu jerasaun tuan la’o ona etapa hadi’a buat hotu, maibé ba jerasaun foun oinsá halo analiza hola parte iha situasaun demokrátika la’o daudaun.

Tanba ne’e, iha esperansa ba Kandidatu Prezidente Repúblika na’in-rua ne’ebé tama iha eleisaun segunda volta, sé mak manán iha eleisaun mai sei sai Xefe Estadu ba povu tomak atu lori dezenvolvimentu ba nasaun.

“Kandidatu Prezidente Repúblika na’in-rua ne’e di’ak hotu mai ita ida-ne’ebé mak povu hili númeru liu sai ukun ema hamutuk hela, nune’e povu mak manán ba dezenvolvimentu, estabilidade, polítika ekonomia ho relasaun internasionál,” nia hateten.

Nia mós husu jerasaun foun atu nafatin respeita lidér nasionál hotu-hotu, tanba partidu ne’e hanesan instrumentu ida de’it ne’ebé nafatin respeita líder jerasaun tuan sira no tau nafatin esperansa sira na’in-rua ida mak eleitu sai Prezidente Repúblika atu hadi’a povu Timor-Leste nia moris di’ak,” nia dehan.

Iha fatin hanesan, Rita Sarmento da Costa, iha esperansa ba Prezidente repúblika foun atu tau atensaun ba preokupasaun báziku iha aspetu sosiál.

Komunidade Manufahi, Rita Sarmento da Costa. Imajen Tatoli/Nelson de Sousa.

“Se kandidatu ida mak eleitu sai PR, nu’udar feto, ha’u husu Xefe Estadu foun tenke tau matan ba feto, atu nune’e bele kapasita sai mós lideransa ne’ebé mak iha responsabilidade bele lidera sai hanesan administradór postu, xefe suku no xefe aldeia,” nia dehan.

Nune’e, maluk feto ne’ebé iha preokupasaun defisil asesu dezenvolvimentu, feto maluk seluk ne’ebé asume knar hirak ne’e bele tau matan fila-fali ba sira atu lori feto ne’ebé iha área rurál bele espresa sai.

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here