Francisco Kalbuadi Lay. Imajen dok. Tatoli.

DILI, 04 abril 2022 (TATOLI)— Tribunál Distritál Dili (TDD), segunda ne’e, deside adia julgamentu dahuluk ba Francisco Kalbuadi Lay, ne’ebé deskonfia envole kazu partisipasaun ekonomia, pekulatu no abuzu konfiasa tanba Juis ne’ebé kaer prosesu halo hela tratamentu saúde iha rai li’ur.

Ministériu Públiku liuhosi Prokuradór Titulár, Rogério Veigas notifika no akuza Francisco Kalbuadi Lay ho krime tolu hanesan partisipasaun ekonomia, tuir  artigu 322, Pekulatu bazeia artigu ba 141 no abuzu konfiansa  iha artigu 179  iha kódigu penál Timor-Leste.

Advogadu Privadu Kalbuadi Lay, Fernando de Carvalho, informa ba jornalista sira iha TDD katak iha razaun rua mak Tribunál deside adia julgamentu mak; dahuluk Juís ne’ebé kaer hela  prosesu ne’e moras no sei halo halo tratamentu saúde iha rai li’ur.

Razaun daruak, mak prazu ba kontestasaun notifikasaun hosi Ministériu Públiku  ba kazu Kalbuadi Lay sei iha prazu loron 15 atu halo kontestasaun ba TDD tanba notifika arguido iha loron 28 marsu, nune’e prazu ba kontestasaun sei remata iha loron 12 abríl 2022.

Nune’e, Defeza presiza haree fila akuzasaun sira ne’ebe Ministériu Públiku akuza ba nia kliente tuir notifikasaun hosi Ministériu Públiku nian tanba falta loron 15, atu kompleta prazu kontestasaun ba notifikasaun hosi Ministériu Públiku.

“Ita haree prazu ba kontestasaun seidauk ramata tan ne’e labele realiza lai julgamentu hodi hein prazu ramata maka foin hala’o julgamentu,” Advogadu Privadu Kalbualdi Lai ne’e hateten ba Jornalista sira iha Tribunál Distritál Dili, segunda ne’e.

Defeza mós dehan nia parte informa on aba Tribunál, hodi halo adiamentu ba julgamentu refere, maske nune’e, adiamentu ne’e rasik la determina data definitivu ba julgamentu ba arguido.

Iha loron 25 fevereiru 2022, liuhusi Prokuradór Titular notifika ona Eis Ministru Turizmu, Komérsiu no Indústria (MTKI), Fransisco Kalbuadi Lay tanba akuzasaun prenxe ona formalizasaun legal tuir prosesu penal.

“Ministériu Públiku notifika Kalbualdi Lay, la’ós ba presta deklarasaun, maibe notifika nia ba akuzasaun hanesan arguidu. Nia (Francisco Kalbualdi Lay) antes ne’e halo ona deklarasaun ba Tribunál antes nia sai ba rai liur hodi halo tratamentu saúde,” nia akresenta.

Jornalista: Natalino Costa

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here