Padre Paróku São José Aimutin, Emanuel Lelo Talok, CMF, dirije misa solene hodi hanoin vitima inundasaun iha loron 4 abríl 2021. Imajen/ Cidalia Fatima.

DILI, 04 abril 2022 (TATOLI)—Governu liuhosi Sekretáriu Estadu Protesaun Sivil (SEPS) hamutuk ho parseiru nasionál no internasionál inklui família vítima sira selebra misa solene tinan ida ba vítima dezastre naturál (Tropical Cyclone) ne’ebé akontese iha loron 4 abríl 2021.

Misa solenidade ne’e hala’o iha Igreja Aimutin-Dili, ne’ebé dirije hosi Padre Pároku  São José Aimutin, Emanuel Lelo Talok, CMF.

Notísia relevante:  Governu planeia tau vítima inundasaun iha alojamentu temporáriu

Iha omília, Amu Emanuel, hateten terus ne’ebé Timor-Leste hasoru iha loron 4 abríl 2021 fó hanoin mai sidadaun hotu atu kontinua hasai orasaun ba vítima sira ne’ebé lakon vida no família sira ne’ebé nia uma hetan estagu hodi hetan grasa wain no tulun hetan tulun.

“Importante mai ita atu hatudu solidaridade ba sira iha situasaun susar nia laran no hamutuk halo orasaun hodi hanoin nafatin vítima sira ne’ebé lakon vida hodi hetan naroman iha Lalehan,” Padre Emanuel afirma.

Iha inundasaun 4 abríl 2021, Padre Pároku ne’e dehan, parokia Igreja Aimutin hamutuk ho sarani sira tau hamutuk osan ho montante $15.000, hodi sosa nesesidade bázika fahe ba vítima sira iha momentu ne’ebá.  

Iha biban hanesan, Sekretáriu Estadu Protesaun Sivíl, Joaquim Gusmão, dehan objetivu hosi selebrasaun misa solene ne’e atu hanoin tinan ida akontese dezastre naturál ne’ebé besik família 6.000-resin mak hetan afetadu no mate na’in-47, hosi númeru ne’e na’in-14 too agora seidauk hetan. 

“Ita selebra misa solene ida ba vitima sira lakon vida no balun too agora ita la hetan.  Selebrasaun misa ne’e mós fó hanoin no sensbiliza ba ita katak dezastre naturál ne’e sempre akontese, nune’e fó pontu atensaun  ba sidadaun sira bainhira akontese dezastre naturál preparadu an atu labele sai vitima,” Sekretráriu Estadu ne’e akresenta.

Tuir dadus hosi SEPS, dezastre naturál  fó impaktu ba uma-kain 31.000 iha territóriu nasionál, hosi númeru ne’e no maioria vítima iha kapitál Dili hamutuk 25.000.

SEPS mós rejista inundasaun ne’e hamate ema na’in-47, hosi númeru ne’e na’in-14 mak to’o agora seidauk hetan.

Governu liuhosi SEPS mós apoia nesesidade báziku, hanesan ai-han no matéria konstrusaun atu halo rekuperasaun ba família vítima 3.000 no falta vítima 3.000 mak seidauk halo rekuperasaun ba hela fatin tanba kestaun orsamentu.

“Ita nia orsamentu 2022  ita prevee deit ba uma-kain afretadu 3.000, maibé ho dezastre naturál ne’ebé akontese iha 4 abríl iha territóriu tomak  vítima 6.000  nune’e ita iha dalan ona atu prepara apoia ba sira hotu,” nia garante.

Nune,e SEPS kontinua fó hanoin ba komunidade sira ne’ebé kontinua iha área risku sira atu ho konsensia husik ona fatin tanba fó ameansa ba sira nia-vida.

“Ita atu muda sira la’ós  servisu mesak,  maibé tenke hamutuk ho entidade sira seluk tanba Governu la taka matan ba sira,  maibé buat sira ne’e hotu sei  prosesu naruk,” nia akresenta.

SEPS mós agradese ba parseiru sira ne’ebé apoia ba inundasaun iha 4 abríl 2021 hanesan,  Uniaun Europeia, Governu Austrália, Aurstralian Aid, Caritas Austrália, USAID, CVTL, JICA, KOICA, Plan International, Care International, OXFAM, Child Fund, World Vision, Mercy Corps, Raes Hadomi Timor Oan, Catholic Relief Services, Nabilan, Peace Winds Japan, ADRA, PARTISIPA, Australian Humanitarian Partership (AHP) no seluk tan.

“Ita agradese ba entidade nasionál no internasionál ne’ebé hamutuk ho governu fó apoia ba vitima inundasaun sira iha loron 4 abríl,” Governante ne’e agradese.

Hafoin misa solene SEPS hamutuk ho parseiru sira  hala’o kampaña sensbilizasaun liuhosi rute Igreja Aimutin, merkadu  Comoro, Fatuhada, Aitarak laran, Colmera, Lecidere, Bidau,  Becora, Fatuahi , Hera no  lori aifunan  ba jardín Eroi  Metinaru.

Notísia relevante:  Governu kontinua tau importánsia ba vítima dezastre naturál

Jornalista : Felicidade Ximenes

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here