Ministra Saúde (MS) Odete Maria Freitas Belo, segunda ne’e, relata progresu  vasinasaun hasoru COVID-19 ba Primeira Ministra Interina no Ministra Solidaridade Sosiál no Inkluzasaun, Armanda Berta do Santos.Imajen/espesial

DILI, 04 abríl 2022 (TATOLI)— Ministra Saúde (MS) Odete Maria Freitas Belo, segunda ne’e, relata progresu  vasinasaun hasoru COVID-19 ba Primeira Ministra Interina no Ministra Solidaridade Sosiál no Inkluzasaun, Armanda Berta do Santos, iha rezidénsia ofisiál Faról-Dili.

“Ohin, Vise Primeira-Ministra hanesan mós Primeira Ministra Interina ba husu atu halo atualizasaun kona-ba prosesu no progresu vasinasaun hasoru Covid-19 iha Timor-Leste liuliu vasina sira-ne’ebé mak ita fó ba idade 18 anos ba leten, nune’e mós ba sira-ne’ebé ho idade 12 to’o menus 18,” Minsitra Saúde Odete Belo, hateten ba Jornalista sira hafoin enkontru ho Primeira Ministra Interina.

Notísia Relevante: COVID-19: kazu rekuperadu na’in-haat no ativu 10

Iha sorumutu ne’e, Primeira Ministra Interina tau hela preokupasaun ba atividade vasinasaun no mós husu ba komunidade sira-nia partisipasaun, la’ós obriga maibé ne’e ema hotu-hotu iha direitu simu vasina.

“Ita nia populasaun elijivel ne’ebé ita ko’alia mak hanesan ema ne’ebé idade 60 ba leten, Frontline sira nomós ema ho komorbidade. Alvu ida-ne’e ita atinje to’o 85% ba doze dahuluk no mós 73% ba doze daruak, maibé sé karik ita hakarak haree Timor laran tomak ita foti populasaun milaun 1.3 ne’e, entaun ita-nia kobertura ne’e seidauk atinje to’o iha 80%,”Governante ne’e akresenta.

Organizasaun Mundiál Saúde (OMS) mós husu “sé karik ita bele atinji 90% iha fulan juñu la’ós vasina doze dahuluk, maibé ema ne’ebé mak vasina kompletu, sé karik ita bele atinji iha fulan juñu, entaun ne’e servisu ida-ne’ebé mak Ministériu Saúde presiza atu halo”.

Ministra dehan katak, “Sé karik ita-nia nasaun bele iha atinjimentu ne’ebé mak di’ak tanba ita la’ós laiha vasina, maibé vasina ne’e disponivel hela iha ita-nia rain, oinsá mak Ministériu Saúde lori vasina ne’e ita-nia komunidade, oinsá mak ita-nia komunidade nafatin konsidera katak sira-nia direitu ba simu vasina hasoru Covid-19.”

Progresu vasina Pfizer ba idade hosi 12 too menus 18, iha persentajen ida-ne’ebé di’ak tanba atinje ona 50%. Nune’e pesoál saúde sira nafatin halo kontinuasaun vasinasaun ba estudante sira iha munisípiu hotu ne’ebé espera katak eskola sira-ne’e hotu-hotu bele hetan vasina Pfizer.

Alende ne’e, Ministériu Saúde mós hala’o ekontru ho Organizasaun Munidál Saúde (OMS) atu haree mós vasinasaun ba labarik sira idade 5 too 11.

“Ohin hato’o ona ba Primeria Ministra katak ami presiza iha karta rekomendasaun ida husi ita-nia komisaun independente ida-ne’ebé hanaran National Imunization Advisory Group (NITAG) sé bele halo rekomendasaun ida mai atu bele hahú vasina Pfizer ba labarik hasoru Covid-19 idade 5 ate 11,” Ministra ne’e afirma.

Kazu COVID-19

Ministériu Saúde hahú 21 marsu 2020 to’o 03 abril 2022, rejista kazu kumulativu konfirmadu 22.832 no óbitu 130.

Hosi horisehik mai ohin, Laboratóriu Nasionál Saúde halo teste PCR  38, kompostu vijilánsia sentinela laiha, rastreiu ba kontaktu laiha, rastreiu aleatóriu tolu, viájen internasionál 35 no follow up iha kuarentena laiha.

Alende ne’e, totál teste PCR ne’ebé halo iha 02 abril 2022 iha munisípiu-sira seluk, Rejiaun Administravu Espesiál Oé-Cusse no Ambeno (RAEOA) no Hospitál Nasionál Guido Valadares (HNGV) 46 hanesan Maubisse laiha, Maliana   neen, Viqueque laiha, Suai 17, Baucau laiha, Ermera laiha, RAEOA laiha, HNGV  40, Lautém laiha, Vera-Cruz laiha no Manufahi laiha.

Populasaun elijível tinan 18 ba leten, ne’ebe simu ona vasina to’o iha loron 03 abril 2022, tuir sistema informasaun Saúde iha Ministériu Saúde, hanesan kumulativu 1ª doze iha Dili (89,4%) no kumulativu 2ª doze iha Dili (84,0%).

Enkuantu, Sidadaun iha territóriu nasionál ne’ebé simu ona vasina doze dahuluk iha Timor-Leste 86,0% no simu ona doze daruak 73,0%.

Iha loron  03 abril  marsu  2022 , izolamentu Vera Cruz, Lahane, HNGV no fatin seluk iha territóriu laran tomak, halo tratamentu hospitalizadu ba kazu detetadu pozitivu laiha no baixa ho COVID-19 laiha.

Notísia Relevante:COVID-19: kazu rekuperadu na’in-lima no ativu 14

Jornalista: Felicidade Ximenes

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here