Konsellu Veteranu RAEOA, Martinho da Cunha. Imajen Tatoli/Abílio Elo Nini.

OÉ-CUSSE, 04 abríl 2022 (TATOLI) – Estudante na’in-70 hosi Rejiaun Administrativa Espesiál Oé-Cusse Ambeno (RAEOA), sai benefisiáriu simu subsídiu kada fulan hosi Ministériu Asuntu Kombatente Libertasaun Nasionál (MACLN, sigla portugés) iha tinan 2022.

Konsellu Veteranu Oé-Cusse, Martinho da Cunha, informa, estudante na’in-70 ne’e prienxe ona vaga atu hetan subsídiu hosi MACLN, mai hosi veteranu 8 a 14 ho mártir nia oan.

Nia fó-sai katak, antes ne’e Konsellu kombatente nasionál fó oportunidade ba Oé-Cusse, ho kritéria hetan subsídiu kada fulan hamutuk vaga 100, ba eskola primária presiza estudante na’in-10, pre-sekundária na’in-10, sekundária na’in-10 no universitáriu presiza na’in-70.

“Maibé Oé-Cusse la prienxe vaga ba universitáriu tanba ita hetan de’it 40, só eskola primária to’o sekundária mak prienxe hamutuk na’in-30, ne’ebé Oé-Cusse hetan de’it na’in-70, tanba veteranu 8 a 14 iha Oé-Cusse ladún barak, entaun lista ita submete ona iha ministériu atu halo prosesamentu,” Martinho da Cunha, informa ba Agência Tatoli iha bairru Horta, Oé-Cusse, segunda ne’e.

Tuir Martinho, kritéria atu asesu vaga ne’e, kada estudante tenke aprezenta dokumetu legál sira hanesan, kópia sertidaun batizmu no hatudu orijinál, aprezenta rezultadu Index Prestasaun (IP) nian, hatudu inan-aman sira nia visa veteranu, no kompleta ho númeru konta bankária, tanba subsídiu Governu sei tranfere direita ba estudante nia konta bankária rasik.

Nune’e valór hosi subsídiu ne’e Governu liuhosi MACLN sei transfere kada fulan ba estudante eskola primária hetan $200,00, eskola pre-sekundária hetan $250,00, eskola sekundária hetan $300,00 no universitáriu hetan $1000,00.

“Subsídiu ne’e la permanente, depende ba nota no valór ne’ebé sira rasik produs, bainhira valór tún, Governu sei termina no hapara hodi fó oportunidade ba estudante seluk, tanba konsellu vetarnu sei tún halo verifikasaun ba valór sira-ne’e, entaun estudante tenke estuda maka’as,” nia fó hanoin.

Purtantu, bazea primeira alterasaun dekretu-lei númeru 8/2009, 15 janieru, kona-ba rejime atribuisaun bolsa estudu ba Kombatente Libertasaun Nasionál nia oan.

Tan ne’e, Governu planu atu implementa sistema atribuisaun bolsa estudu ba mártir sira no Kombatente Libertasaun Nasionál sira-nia oan, hodi abranje ka kobre nível eskolaridade to’o ensinu superiór.

Notisia relevante: Tinan 2022: MAKLN atribui bolsa estudu ba veteranu nia oan 1.300

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan