Edifísiu CNE. Imajen TATOLI/Francisco Sony

DILI, 04 abril 2022 (TATOLI)–Ekipa susesu kandidatu Prezidente Repúblika (PR) hosi partidu Congresso Nacional de Reconstrução de Timor (CNRT) ho númeru sorteiu 01, José Ramos Horta, husu ba órgaun eleitorál atu halo serbisu iha terrenu ho rigór, nune’e bele hetan rezultadu eleisaun di’ak no justu ba parte hotu.

“Ami rejista durante ne’e ekipa hosi kandidatu seluk halo fraude eleitorál ka uza osan ba sosa votu, maibé dehan fali kandidatu númeru 01 nia ema mak halo fraude. Ami buka hela atu deskobre no iha ona indísiu katak fraude sira balun hosi apoiante kandidatu seluk, tanba ne’e ami husu ba órgaun kompetente halo investigasaun, tanba ami rona iha munisípiu balun ema halo intervensaun direta hodi obriga funsionáriu kontratadu sira vota ba sira-nia kandidatu, kuandu laiha maka sira sei lakon serbisu, indísiu sira ne’e iha ona. Tanba ne’e ami mós husu ba observadór internasionál no membru Komisaun Nasionál Eleitorál (CNE, sigla portugés) sira hodi buka hatene saida mak akontese,” Portavós ekipa susesu, Dionísio da Costa Babo Soares, hateten liuhosi konferésia imprensa iha sede kandidatura, Hudi-laran segunda ne’e.

Notísia relevante: CNE deside kampaña ba segunda volta ramata iha 13 abríl

Nia dehan, ema hotu louva Timor-Leste nia prosesu eleitorál tomak, tanba ne’e presiza mantein situasaun ne’e, nune’e imajen Timór kontinua di’ak iha rejiaun no nasaun sira seluk.

“Timór nasaun ida ho índise demokrasia boot tebes, tanba ne’e tenki kontinua mantein iha prosesu eleitorál sira tantu eleisaun prezidensiál no parlamentár, tenki kumpre regra no respeita prosesu legál hotu ne’ebé ita tenki kaer hodi bele garante katak ema hotu simu rezultadu eleisaun nian,” Eis membru Governu ne’e hateten.

Jornalista : Antónia Gusmão

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here