Ekipa dezastre naturál Oé-Cusse oferese ai-han ba família vítima 4 abríl 2021 nian iha Pante Makasar. Imajen mídia SEPS.

OÉ-CUSSE, 04 abríl 2022 (TATOLI) – Ekipa dezastre naturál hosi Rejiaun Administrativa Espesiál Oé-Cusse Ambeno (RAEOA), segunda ne’e apoia família vítima dezastre siklone tropikál seroja 04 abríl 2021, iha bairru Kiupanaf, aldeia Noafafo, suku Cunha, sub-rejiaun Pante Makasar.

Ekipa konjunta responsável ba dezastre natural iha Oé-Cusse, komposta hosi Sekretariadu Protesaun Sivíl (SEPS), Cruz Vermelha Timor-Leste (CVTL), Ministériu Solidariedade Sosiál no Inkluzaun (MSSI), Gabinete PrezidenteAautoridade hamutuk Bombeiru RAEOA nian.

Komandante Bombeiru RAEOA, Martinho Corbafo da Cunha, hatete, akontesimentu dezastre natural iha loron 4 abríl 2021 hanesan kalamidade boot ne’ebé povu Timor-Leste hasoru iha tempu ne’eba, no Oé-Cusse vítima ida hosi suku Cunha, José Colo, ho idade 71 lakon nia vida iha mota Kiupanaf tanba mota lori to’o lakon nia vida, hodi husik hela oan ki’ak na’in-hitu (7) ho feen kaben.

“Entaun ohin ekipa konjunta hetan orientasaun hosi nasionál, atu mai tau matan, lori sasán urjénsia apoia família vítima-sira, ita oferese hanesan foos saka tolu (3), mina bimoli litru-lima (5) ida ho biskuit, nu’udar konsiderasaun ida tanba lakon nia vida iha situasaun difisíl iha tempu ne’ebá,” António Corbafo, informa ba Agência Tatoli iha Oé-Cusse, segunda ne’e.

Nia infroma, objetivu hosi apoia ne’e, tanba loron ohin kompleta tinan ida, hanesan kalamidade ida ne’ebé akontese iha loron 4 abríl povu Timor-Leste hasoru susar tanba akontese dezastre naturál iha situasaun pandemia COVID-19, dezastre ne’e balu lakon vida, lakon família, uma no patrimónia seluk, tan ne’e ohin ekipa halo asaun ne’e.

“Maibé ekipa dezastre la garante ba família vítima kona-ba apoia ne’e nia kontinuasaun iha tinan oin, tanba depende hosi Governu nia desizaun iha nível altu, karik iha kontinuasaun, nu’udar ezekutadór iha munisípiu sei hala’o nafatin asaun ne’e,” nia katak.

Xefe Bairru Kiupanaf, Vicente Sonet, reprezenta autoridade komunitáriu suku Cunha, agradese ba Governu, tanba oferese ona apoia ai-han ba família.

“Ami hanesan autoridade lokál iha bairru ne’e, hakarak agradese ba Governu liuliu autoridade Oé-Cusse, tanba ohin mai oferese ai-han ba família vítima, hodi bele tulun sira hamutuk ho nia oan-sira, maske ita-nia família lakon ona maibé parte Governu konsidera dezastre ne’e hanesan kalamidade boot ida ba povu Timor-Leste,” autoridade lokál ne’e hateten.

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here