Ekipa susesu kandidatu Prezidente Repúblika númeru sorteiu 2, Francisco Guterres ‘Lú Olo’ hala’o konferénsia imprensa hafoin remata enkontru alargada iha CCB, Vila Antiga, sábadu (02/04). Imajen TATOLI/Natalino Belo.

BAUCAU, 02 abríl 2022 (TATOLI) – Ekipa susesu kandidatu Prezidente Repúblika Francisco Guterres ‘Lú Olo’ garante votu aumenta no manán iha munisípiu Baucau.

Liuhosi reuniaun alargada entre Partidu Libertasaun Popular (PLP), Kmanek Haburas Unidade Nacional Timor Oan (KHUNTO), Frente Revolusionária Timor-Leste Independente (FRETILIN), kandidatu partidu polítiku Os Verde de Timor no organizasaun aliadu sira reafirma pozisaun apoia kandidatu Lú Olo iha volta daruak eleisaun prezidensiál períodu 2022-2027.

“Atu garante susesu kandidatu Prezidente Repúblika Francisco Guterres ‘Lú Olo’ presiza akumula forsa tomak, apoia laiha rezerva no vijilánsia totál hodi la’o ba sentru votasaun iha loron 19 abríl no vota ba kandidatu Lú Olo,” Koordenadór Partidu FRETILIN Munisípiu Baucau, Abrão Oliveira, ko’alia iha Sentru Konvensaun Baucau (CCB, sigla portugés), Vila Antiga, sábadu ne’e.

Ekipa susesu kandidatu Prezidente Repúblika Francisco Guterres Lú OLo liuhosi enkontru koordenasaun fó-sai deklarasaun katak iha inisiativa fó apoia ba kandidatu Prezidente Repúblika Francisco Guterres ‘Lú Olo ho númeru sorteiu 2 iha loron 19 abríl.

Alende ne’e, simu no habelar orientasaun serbisu hosi Komité Sentrál FRETILIN (CCF, sigla Portugés) ba postu kampaña hotu-hotu iha teritoriu  nasionál espesiál iha munisípiu Baucau, simu orientasaun hodi junta forsa tomak hamutuk ho aliadu sira hodi fó susesu ba kandidatu Lú Olo iha eleisaun prezidensiál volta daruak.

Ekipa susesu iha Baucau garante kandidatu Prezidente Repúblika Lú Olo sei manán ho votu maioria iha Baucau hafoin forsa aliadu sira fó apoia másimu durante eleisaun prezidensiál tanba tuir dadus iha eleisaun volta dahuluk Lú Olo manán iha Baucau ho votu 27.463 (40,15%) no eleisaun parlamentár tinan 2017 PLP hetan votu 18.000 no KHUNTO 3.000.

Partisipa iha reuniaun alargada refere hanesan Vise Prezidente FRETILIN no Prezidente Komisaun Organizadora Kandidatu Lú Olo zona leste, Aniceto Guterres, Koordenadór Os Verdes Baucau, João Buka-Tuir, Portavós PLP Nasionál, Noé da Silva Ximenes ‘Buka Tuir’, Koordenadór KHUNTO, Angelo Angelino no reprezentante organizasaun aliadu sira iha Baucau.

Jornalista    : Natalino Belo

Editór           : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here