Reprezentante Governu Timor-Leste no parseiru hasai foto hamutuk hafoin selebra akordu finansiamentu ba programa sistema nasionál ai-han no implementa atividade redusaun risku dezastre naturál iha Timor-Leste. Imajen/Espesiál

DILI, 01 abríl 2022 (TATOLI)—Organizasaun Nasaun Unida (ONU) kontribui fundu millaun $1 hodi reforsa programa sistema nasionál ai-han no implementa atividade redusaun risku dezastre naturál iha Timor-Leste.

Fundu ne’e aloka ba Programa Ai-han Mundiál (WFP, sigla portugés), Organizasaun Ai-han no Agrikultura (FAO, sigla inglés) no Organizasaun Mundiál Saúde (OMS) ne’ebé sei serbisu parseria ho Ministériu Agrikultura no Peska (MAP) no Ministériu Saúde (MS).

“Iha Timor-Leste, Planu Estratéjiku Dezenvolvimentu trasa vizaun jerál nasaun ba tranzisaun hosi nasaun seidauk dezenvolvidu ba nasaun ho rendimentu ekonomia naton iha tinan 2030, ho populasaun ne’ebé saudável no seguru. Vizaun ne’e define objetivu hosi setór agríkola inklui hadi’a  sistema nasionál seguransa ai-han, redusaun pobreza rurál, promove sustentabilidade no konservasaun ba Timor-Leste ninia rikusoin rekursu naturál,” Diretora Jerál MAP, Maria Odete do Ceu Guterres, hateten, liuhosi nota ne’ebé Agência TATOLI asesu, sesta ne’e.

Notísia relevante: Populasaun TL 36% enfrenta inseguransa ai-han grave

Tuir Diretora Maria Odete, projetu ne’e diretamente sei liga ba vizaun longu prazu nasaun, um tersu hosi totál populasaun ne’ebé enfrenta krónika iha inseguransa, ne’ebé konsidera a’as iha Sudeste Aziátiku.

Tanba ne’e Governu hetan apoiu hosi ajénsia ONU no parseiru dezenvolvimentu sira atu responde ho asaun urjente, nune’e haforsa sistema ai-han no empodera produtór no konsumidór sira ne’ebé vulnerável, inklui feto no labarik feto sira.

Governu konsidera, mantein produsaun agríkola nu’udar pilár importante ba ekonomia naun-petrolíferu iha Timor-Leste no bele fó serbisu ba populasaun hamutuk 70%, maibé realidade nasaun sei kontinua hasai gastu barak ba ai-han no importasaun ai-han hosi rai-li’ur maizumenus 40%.

“Kuantidade signifikante ba produsaun ai-han estraga bainhira sei koilleta no la konsege to’o ba konsumidór sira,” nia dehan.

Liuhosi projetu ida-ne’e, WFP sei haforsa kapasidade atu dezenvolve sistema previzaun nasionál hodi monitoriza estensaun krize ai-han, FAO sei fornese teknolojia no hala’o atividade kapasitasaun liu atu redús estragu sira durante halo koilleta, no WHO sei halo atividade prátika dieta saudável liuhosi programa edukasaun nutrisaun sensitivu no mudansa hahalok ba konsumidór sira, liuliu ba inan isin-rua no inan fó susu no labarik sira.

Reprezentante WFP iha Timor-Leste, Dageng Liu, hateten, WFP hanesan organizasaun umanitária ida boot iha mundu, ne’ebé serbisu atu salva moris iha situasaun emerjénsia no utiliza asisténsia ai-han hodi harii pás, estabilidade, no prosperidade ba ema hotu hodi rekupera husi konflitu, dezastre, no impaktu hosi mudansa klimátika.

“Fundu ida-ne’e mai iha tempu ne’ebé krusiál tebes, liuliu tanba to’o agora populasaun Timor-Leste sei hetan impaktu hosi COVID-19,” Dageng Liu dehan.

Liuhosi inisiativa multisetorál ne’e, WFP sei suporta hodi dezenvolve ferramentu previzaun krize ai-han ne’ebé sei utiliza durante implementasaun estratejia nasionál ba planu redusaun risku dezastre, mitigasaun dezastre, no preparasaun.

Biban hanesan, Reprezentante WHO, Arvind Mathur, hateten, organizasaun ne’e globalmente serbisu hodi promove saúde di’ak, mantein mundu seguru, no serví grupu vulnerável sira.

WHO asegura katak ema liu biliaun ida resin bele hetan kobertura ba saúde, atu proteje bilaun ida resin hosi kondisaun saúde emerjénsia, no fornese populasaun bilaun resin ho saúde no bem-estar ne’ebé di’ak.

“Projetu ida-ne’e kobre fornesimentu no demanda ba ai-han, iha parte seluk, promosaun ba ambiente polítika ai-han seguru no saudável, no mós mudansa hahalok ba nesesidade konsumidór sira bele harahun síkulu mánutrisaun ba internerasional sira, liuliu ba grupu vulnerável sira hanesan feto no labarik sira,”Arvind Mathur, akresenta.

Reprezentante FAO, Rajendra Aryal, hateten, organizasaun mundiál ne’ebé lidera esforsu internasionál atu kombate hamlaha.

Projetu ne’e mai iha tempu ne’ebé loos no importante atu hamenus estragu ai-han liuhosi redusaun estraga ai-han durante tempu koilleta, ne’ebé bele hasa’e produtividade no asesu ba ai-han, no proteje ekosistema. Asegura mós katak produtór lokál sira bele tama iha merkadu seguru, liuhosi polítika advokasia, no asegura mós insentivu ba sustentabilidade korrente fornesimentu ai-han.

“Ami-nia objetivu mak atu atinje seguransa ai-han ba ema hotu no asegura katak ema hotu-hotu iha asesu regulár ba kuantidade ai-han ne’ebé natón hodi moris ho ativu no saudável,” nia dehan.

Koordenadór Rezidente ONU iha Timor-Leste, Roy Trivedy, dehan, programa konjuntu ne’e sei foku ba halo mudansa transformativu hodi rezolve ba problema má-nutrisaun, seguransa ai-han, menus produtividade agríkola iha Timor-Leste no liga diretamente ho kometimentu konjuntu ba Kuadru Kooperasaun Dezenvolvimentu Sustentável Nasaun Unida, ho hanoin atu kontribui no aselera progresu ba meta ODS.

Parseiru dezenvolvimentu ne’ebé hetan fundu hosi fundu konjunta ODS ne’e hamutuk 13 hanesan Uniaun Europeia, Denmark, Alemaña, Irlandia, Luxemburgo, Monaco, Norwégia, Portugál, Repúblika Korea, España, Swédia, Suísa, no Olanda.

Jornalista : Arminda Fonseca

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here