Komisariu CAC, Sérgio Hornai. Imajen TATOLI/Egas Cristóvão

DILI, 01 abril 2022 (TATOLI)— Komisáriu Anti Korrupsaun (CAC,sigla Portugés), ho entidade relevante sei kriminaliza funsionáriu sira ne’ebé utuliza veíkulu Estadu ba partisipa kampaña eleitorál eleisaun prezidensiál iha primeiru volta no segunda volta. 

“Rezultadu monitorizasaun ne’ebé maka ekipa sira halo iha primeiru volta, konsege deteta funsionáriu balun sai apoiante ba Kandidatu Prezidente balun uza veíkulu Estadu hanesan motorizada 18 inklui karreta neen maka partisipa iha atividade kampaña eleitoral,” Komisáriu Anti Korrupsaun (CAC), Sergio Hornai, hateten ba jornalista sira liuhusi konferénsia imprensa ne’ebé hala’o iha edifisiu KAK-Faról, sesta ne’e.

Viatura Estadu hirak ne’ebé ekipa KAK identifika iha munisipiu sira mak hanesan Aileu, Baucau Bobonaro, Dili, Ermera, Lautem no Manatutu.

“Evidénsia sira ne’ebé maka ekipa KAK rekolla iha terenu, daudaun ne’e KAK halo ona koordenasaun ho Ministériu relevante atu karik tuir nesesariu ne’ebe ita halo partisipasaun auto notísia ida ba iha Ministériu Públiku hodi haree ba kestaun sira ne’e,” Komisáriu ne’e akresenta.

Bazeia ba rezultadu monitorizasaun ne’ebé ekipa CAC halao durante kampaña eleisaun Prezidensiál, nune’e CAC rekomenda ba ba entidade kompetente sira hanesan;  

Autoridade KFP atu foti medida dixiplinar ba funsionáriu públiku, asesor no funsionáriu apoimentu politiku sira ne’ebé partisipa iha kampaña sein pedidu lisensa tuir Dekretu-Lei númeru 40/08, loron 29 outobru, kona-ba Rejime Lisensa no Falta traballador sira iha Administrasaun públika, iha artigu 41(3) ne’ebé ona ho DL númeru 21/2011.

Rekomenda mós ba Ministériu no Instituisaun sira Estadu direta no indireta sira atu kontrola funsionáriu sira ne’ebé utiliza veíkulu sirak Estadu nian durante períodu kampaña eleisaun

“Ita rekomenda ba Polísia Nasionál Timor-Leste (PNTL) atu kontrola no hapara veíkulu sira Estadu nian inklui veíkulu sira la-uza xapa matríkula no partisipa iha tempu kampaña politika,” nia akresenta.

Komisaun Nasionál Eleisaun (CNE) no Sekretáriu Estadu Administrativa Eleitorál (STAE) atu labele autoriza kandidatu sira utiliza fatin kampaña besik edifisiu públiku, eskola no igreja.

Iha kampaña, Komisáriu mós husu ba Partidu Politiku no kandidatura-sira iha obrigasaun atu promove no halo esklaresimentu ba mililitante no simpatizante no dirijente sira atu hases an husi risku korrupsaun, liuhusi uza abuziva bens ka patrimonia estadu ba interese patridaria no husu atu evita hodi utiliza fasilidade Estadu no pesoal seguransa ho ekipa bo’ot ba kandidatu sira.

“CAC nu’udar autoridade ka orgaun polisiál kriminál kompetente sei atua no prosesa tuir lei ba infrasaun sira ne’ebé deskobre durante períodu kampaña ne’e,” Komisáriu ne’e akresenta.  

CAC koloka ona ekipa haat ba iha terenu hodi halo monitorizasaun ba prosesu kampaña Prezidensiál iha munisípiu 12, eseptu Rejiaun Espesiál Adminsitrativa Oé-Cusse no Ambeno (RAEOA) no Atauro.

Tanba, CAC konsidera katak kampaña eleitorál nu’udar eventu politika ida boot no envolve rekursu estadu ne’ebé signifikante, inklui potensia atu utiliza rekursu estadu nian ne’ebé ses husi fins ba interese publiku hanesan uza veíkulu sira Estadu nian hodi fasilita ka apoiu ba kampaña eleitorál ne’ebé la’ós ba fins profisionál.

Konsidera artigu 5 (1) Lei númeru 8/2009 kona-ba Kriasaun CAC iha materia prevensaun kriminál no Artigu 9 Dekretu-Lei númeru 23/2015, kona-ba Estrutura Organika CAC, deside atu halo monitorizasaun ba atividade kampaña eleitorál hosi kandidatu sira.

Notísia relevante: CAC notifika ona funsionáriu uza viatura Estadu partisipa kampaña eleitorál

Jornalista : Natalino Costa

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here